為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2019 年 05 月 16 日

屈政治審查 議助玩轟炸 立法會秘書處被欺凌

立法會審議修訂《逃犯條例》不但爭拗不斷,泛民仲大肆搗亂,將莊嚴嘅議事廳變成「鬥獸場」,上演激動飛撲、爬枱搶咪、扯腳拉手。

據知激戰過後,除咗部分保安被無情力撞到周身痛之外,幾位身型纖瘦嘅女職員因為充當「人肉盾牌」,一邊廂擋着激進泛民嘅衝擊,又要處理一些混入記者堆中乘機衝撞嘅議員助理,點知拳腳無眼,混亂間亦被撞到成身又紅又瘀,但佢哋為息事寧人,事後一句聲都冇出,返回秘書處繼續做嘢。

「睇見佢哋好慘,近排頻頻畀人針對、狂鬧、滋擾,o依家畀人推撞,都粒聲都唔敢出!」有立法會議員說,最離譜係泛民未查清楚就推個已辭職嘅保安員出嚟,大大聲話喺一七年時,秘書處曾透過佢嘅上司,要求佢填寫係「黃絲」或「藍絲」嘅政治立場表態問卷,又話拒絕表態後就被上司針對,最終不堪壓力辭職,工作至今個月底。

雖然秘書處已回應絕無此事,但一班泛民議員就咬住唔放,之不過佢哋唔係攞證據出嚟證明真有其事,而係由得啲議助,不斷向秘書處作出滋擾同挑機等欺凌行為。有人仲將秘書處嘅電話號碼放上網,叫網民打去「畀意見」,搞到日日有人打電話去鬧職員,聽講佢哋幾日就接咗超過一百個滋擾電話,嚴重影響正常工作。

有睇唔過眼嘅消息人士向本刊透露:「政治審查」指控嘅背後,其實另有版本。據悉該名聲稱畀人迫害嘅女保安係退休海關人員,有前同事形容佢性格孤僻,工作態度一向麻麻,對人亦唔太友善,「佢之前畀人投訴,話佢經常喝罵送外賣去立法會嘅外賣仔,保安部於是要求佢交代事件,點知佢唔忿氣畀人投訴,一怒之下就辭職唔撈。」

後來有議員知道佢辭工唔做,問起原因,佢聲稱被上司針對,又話上司曾問佢係「黃絲」定「藍絲」,相信因而被人拿來大做文章。

本刊就呢個版本向秘書處求證,佢哋話事件已安排喺五月二十號舉行嘅行管會會議度跟進,所以暫時無任何回應。至於幫嗰位保安員「發聲」嘅譚文豪,就話遲啲先再交代。究竟成件事會唔會係林子健嘅「釘書機」翻版,真係拭目以待。

莊嚴議事廳被泛民一浪接一浪嘅衝擊而淪為「鬥獸場」,不少夾在中間維持秩序嘅立法會職員,在混亂中被撞到成身又紅又瘀。

 

泛民議員大肆搗亂後,又高調地報稱受傷要送院。

 

報稱遭政治審查嘅立法會女保安員,在譚文豪陪同下高調呼冤。但近日傳出事件其實另有版本。