為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2019 年 05 月 18 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

心「悅」誠「服」

不少企業發展到一定規模會考慮分拆旗下公司,特別係大型房地產集團,數數手指,過去分拆物業管理業務嘅內房股就有花樣年(1777)旗下彩生活(1778)、中海外(0688)旗下中海物業(2669)、雅居樂(3383)嘅雅生活(3319)等等。物管公司有較高現金流及穩定嘅客戶黏性,對收息族投資者確實有一定吸引力。

中國奧園(3883)亦於今年三月分拆奧園健康(3662),後者除物業管理外仲有健康產業和商業營運。過去三年奧園健康管理面積複合增長率超過兩成八,截至二○一八年底,公司喺內地十一省六十一項物業提供物管服務,管理樓面超過一千萬平方米。一八年公司收入按年增近四成二,至六億二千萬元(人民幣,下同),純利七千八百萬元,升一成二;剔除上市及相關費用影響嘅核心淨利潤升兩成六。母公司土儲超過三千四百萬平方米,會優先提供項目畀系內公司,所以奧園健康上市後唔需要急於作大規模收購以比拚面積。

買樓到入住有好多瑣碎事,奧園健康嘅物管提供全生命周期服務,幫雙方減省時間同精力。除一般住客服務外,仲包括向物業開發商及業主提供預售、交樓前及交樓後嘅銷售輔助服務。上年物管服務收入中,銷售輔助服務收入升一倍多。

為打造高效和高質物業服務,公司利用大數據、人工智能、互聯網+等,不斷主動為服務升級。要與時並進,同世界接軌,利用大數據係大勢所趨。公司打造線上線下平台,建立智能社區,以提供增值服務及提升客戶滿意度。「奥悅家」應用程式(App)喺一七年推出,直至一八年底已覆蓋五十六個管理項目,註冊用戶約二十八萬。相信呢個平台可以方便公司收集數據,作出更精準嘅數據分析,進一步提升服務質素。

公司嘅商業營運業務,除咗商業地產運營及管理外,亦包括商場開業前嘅市場定位及商戶招攬,甚至開業後與周邊社區作互動交流等;業務分類上年收入增四成,佔總收入比例近兩成七,成績不俗。

有研究指二○二○年中國大健康產業市場規模將達到八萬億元,加上國家推動「健康中國」建設,相信可以為產業帶來巨大機遇。公司於一八年進入大健康領域,以「物業+大健康」概念,將所管理項目打造成特色中醫醫療服務小區。另外旗下奧園醫美亦與韓國吉紐思集團合作,引進國際醫療團隊、現代化醫療體系與服務理念,今年三月喺廣州番禺萬博開設首間旗艦店。

奧園健康發展三大業務,都係以服務承托。服務令客戶滿意只係達標,能夠用心做到令人喜出望外至係上乘,所以奧園建立「悅服務」模式,提出「以心相兌、以誠相待」嘅服務理念。「心+兌」等如「悅」,要客戶心悅當然要以誠服務,呢個服務指標確實非常貼切。

奧園健康今年三月上市,旗下「奧悅家」應用程式有二十八萬註冊用户。