為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2019 年 05 月 12 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

夫妻同心

要選圈中恩愛夫妻,新婚半年嘅江若琳(Elanne)同蕭潤邦(Oscar)必定榜上有名,二人婚前婚後都全天候放閃,可謂羨煞旁人。

今次「Paco巨星飯堂」,我就去到有「生煎包王子」之稱嘅Oscar主場:位於旺角嘅「堅信號上海生煎皇」新舖,品嘗佢用心炮製嘅上海特色美食,暢談二人婚後嘅生活點滴。

結婚半年,Elanne同「生煎包王子」Oscar甜蜜依然,雖然二人嘅事業各有發展,但係佢哋都相當重視家庭生活,所以就算新舖開業,蕭生蕭太都拍住上。

 

初拍秋官

雖然Elanne於去年十二月已冠上Oscar姓氏,成為蕭太,但佢嘅演藝事業,仲係現在進行式,喺正在熱播嘅ViuTV劇集《詭探前傳》,就係佢其中一個作品。「我喺劇中飾演秋官嘅大女,當我知道有呢個機會嘅時候,真係好開心!因為秋官o依家都少喺香港拍劇,我仲要飾演佢個女,同佢有唔少對手戲,真係好難得!」

講到「爸爸」秋官,Elanne話:「雖然劇情講述我哋兩父女見親面都嗌交,但係鏡頭後,佢好照顧成個劇組,『萬歲』係指定動作啦!不過一埋位佢就好Pro,初時要我拍鬧佢嘅戲,坦白講我真係驚嘅,但秋官每次埋到位,都好快帶到我入戲。」

同秋官合作冇難度,Elanne話「Big boss」反而係飾演佢囡囡嘅小演員。「我嘅角色除咗係秋官個女,仲係一個單親媽咪,有一個兩歲嘅女,個小演員太細個,好多時都唔知發生緊咩事,有時佢瞓緊覺,又要被叫醒拍戲,所以佢會喊,全場人要一齊唱兒歌,o氹番佢開心。」

我去到兩位嘉賓嘅主場、位於旺角嘅「堅信號上海生煎皇」,品嘗Oscar用心炮製嘅上海特色美食,暢談二人嘅生活點滴。

 

喺享受幸福生活嘅同時,Elanne繼續演藝事業,於ViuTV新劇《詭探前傳》中,飾演秋官囡囡,角色甚有發揮。

 

 

 

堅信號生煎包($18兩個/$34四個)為餐廳招牌菜,薄薄嘅外皮包裹湯汁同肉餡,令人一試難忘。

 

蟹粉小籠包($38兩個),皮薄內juicy。

 

新翠味小籠包($22兩個/$40四個),為創意素菜。外皮以苦瓜汁、菠菜汁製作,餡料為木耳絲、翠玉瓜及新豬肉,味道清新。

 

新店開業

演藝事業繼續嘅同時,Elanne不諱言,婚後將家庭放喺第一位。「o依家少咗接內地嘅Job,因為要花長時間留喺當地,老公又唔可以放低生意去搵我。餐廳係佢嘅夢想,我嫁得俾佢就要支持佢嘅夢想,同時佢都好支持我,呢樣嘢係收入彌補唔到嘅!」

Elanne說時一臉甜蜜,全因Oscar嘅夢想又進一步實踐。「新舖啱啱開業,其實係因為舊舖業主大幅加租,我小本經營真係負擔唔起,就搵咗呢個新舖。既然要重新開始,我就將新舖嘅裝修年輕化,成間餐廳都比舊舖光猛啲,客人坐得舒服啲。」

o依家Oscar嘅生煎包王國,有五間位於旺區嘅餐廳,佢已經有下一步計劃,「o依家建立好餐廳嘅品牌,我希望下一步係喺大型商場開舖,尤其o依家天氣開始熱,好多人行商場,我想將自己製作嘅菜式,推廣到大型商場,再逐步發展。」

Elanne表示夫婦二人都熱愛小朋友,所以正專注調理身體,以生B為目標。

 

行山係蕭氏夫婦嘅拍拖活動之一,Elanne話行山有益健康,所以會拉埋老公行孖咇。

 

除咗孖咇行山,Elanne會定時做gym保持fit爆體型。

 

川麻雞中翼($38),麻辣同雞翼十分搭配。

 

四川擔擔麵($42),麵質有咬口,配上秘製醬料,不可不試。

 

生B大計

喺Oscar計劃拓展事業版圖之際,佢同Elanne喺另一大計上,已經達成共識。Elanne表示:「我哋結婚嘅時候,已經打算生BB,我媽咪仲心急過我哋!成日話生豬仔好,哈哈!不過,我前排做過一個小手術,o依家仲調理緊,老公都成日煮好嘢俾我進補。

「另外,我亦有keep住做運動,又拉埋佢同我一齊行山,話就話我哋兩個都有晒心理準備,隨時做得爹哋媽咪,但係健康上都要ready嘅。」

Oscar嘅生煎王國已有五間店,佢話將會拓展版圖到大型商場,現已積極睇舖位。

 

除傳統生煎包,Oscar加入創意製作素食,仲因而獲獎。

 

Oscar親力親為打點新舖事宜,100%投入!

 

蜜椒雞扒菜飯($50),經秘方醃製嘅雞扒,滋味無窮。

 

爽滑魚蛋湯麵($36),餐廳特製嘅魚蛋,以黃門鱔炮製,夠晒彈牙。

 

外婆紅燒肉菜飯($55),肥豬肉毫無膩感,令人不自覺encore。

 

堅信號上海生煎皇
地址:旺角花園街3-5號地下
電話:2882 8805