江華拒拍《尋秦記》養生

現年五十六歲嘅江華，喺〇四年離開無綫轉戰內地拍劇，返港後就逐漸淡出幕前，近年更加轉投保險行業，闊別香港嘅觀眾已經有一段長時間。近排，古天樂牽頭嘅《尋秦記》電影版開拍，當年劇集版嘅演員，包括：林峯、宣萱、雪兒、郭羨妮，都陸續落實演出，但就單單欠咗當年劇中飾演連晉、嫪毐嘅江華，好多網民都話冇咗佢，就唔算係原班人馬，大嘆可惜！

不過，o依家嘅江華，表明唔會為錢而隨便拍劇，早前佢仲解釋，冇份演電影版《尋》嘅原因，覺得一部電視劇或電影，可以成為觀眾心目中嘅經典已經好勁，認為冇必要重拍，更何況廿年前班底嘅演員，都已經老喇！

早前，東姑就喺尖沙咀圓方商場巧遇江華，發覺佢私底下生活，真係好養尊處優，完全係悠悠閒嗰種感覺，相當自得其樂。當日，佢戴上黑色cap帽，着黑色衫褲加波鞋，一身潮童look嘅打扮，外表睇嚟，比起佢實際年齡後生咗十幾二十年。而佢啲表情、動靜，仲係一貫咁似劉德華，一見到東姑，就好似萬人迷咁，笑晒口同東姑say hello，非常之咁風騷。

之後，江華就一個人走咗入間超市，見佢喺飲食方面原來都幾健康，全程都係揀一啲新鮮嘅生果、有機嘅嘢食，同埋一啲健康飲品之類。保持心情開朗，悠悠閒冇壓力，而飲食又健康養生，難怪佢保養得宜喇！

淡出幕前，平時生活悠閒自在嘅江華，一見東姑就心情風騷，仲同東姑打晒招呼。

現場所見，江華嘅表情、動靜，仲係一貫咁「比劉德華更加劉德華」。

轉職做保險嘅佢，冇以前做幕前咁衝鋒陷陣，仲一個人悠悠閒逛吓超市，買啲嘢食做晚餐。

買健康有機嘢為主嘅佢，喺生果部選購得最耐，仲買咗成大袋紐西蘭蘋果添。

睇唔出江華都幾住家男人，揀奇異果時，佢就攞上手左望右望，睇落相當熟手。

當年嘅電視版《尋秦記》，江華飾演嘅大奸角連晉、嫪毐，係第二男主角，同古天樂飾演嘅項少龍敵對。

古天樂旗下嘅公司，開拍電影版《尋秦記》，有當年電視版原班人馬演出，但就獨欠江華，認真可惜。