為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2019 年 05 月 12 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

人生交叉盤邁向二十年

過年前同傳媒飯敍,有位年輕記者一嚟到就同我講,我媽咪好鍾意聽你做節目。當時我嚟唔切反應,之後諗返我個電台節目《人生交叉盤》今年都已經踏入二十周年,聽眾做咗父母甚至爺爺嫲嫲都好正常。不過,回想二○○○年離開證券行業當獨立股評人,跟住喺商台開咪,真係冇諗過一做就接近廿年。

一個個人意見電台節目,冇改過名,冇換過主要主持,嚟到第廿年中間冇停播過,都屬於一個小小紀錄。過去傳媒出現嘅財經節目多不勝數,甚至轉到社交媒體開live,《人生交叉盤》緊守傳統電台陣地,一直冇被聽眾遺忘,我確實好幸運,更欣慰嘅係同聽眾建立友好關係,一齊度過一個又一個金融巨浪。

有句話「我不是鈔票,做不到人人喜歡」,雖然係講笑,但咁多年來點評大市和個股,又點會冇睇錯過?如有誤判,我會坦然接受批評甚至指責,不過我一直強調投資者應該有正確投資態度,並要建立平衡嘅投資組合,至可以承受買錯嘅風險。我曾經講過,有啲概念股可以炒到升幾倍,唔係唔買得,而係要控制組合,例如我提過嘅六(可以年計長揸嘅優質股)、三(自己熟識升跌韻律嘅波幅股)、一(投機股)比例。好高興我嘅聽眾心理質素非常高和投資態度正確。

聽眾可能聽過我講,股市牛氣沖天時人人都係股神,我叫大家小心等於「阻人發達」,但主持節目咁多年,科網熱潮、九一一、沙士、○七夢幻直通車大牛市、金融海嘯,高高低低都經歷過,當中印象最深刻嘅唔係大牛市,而係○八年一月和九月大跌市。當時商台同我一齊做咗一個重要決定,將原來下晝三點結束嘅節目延長一個鐘去到收市,接聽聽眾電話,聆聽股民心聲。我聽到佢哋頭腦清醒,慶幸自己同大家一齊經歷波浪而成長。

同樣係○八年,四川發生大地震,我剛好推出新書《我筆講股》,就喺《人生交叉盤》節目內發起義賣一百本限量版新書,結果五日內籌到三十幾萬善款,連同其他捐款共逾百萬。我最欣喜係認購嘅主要係小市民投資者,好多聽眾打嚟認購時話聽節目賺到錢所以回饋社會,而最高單一認購價更達到二萬五千元,由一位聽眾梁先生認購011號書創下。透過節目可以同聽眾建立密切聯繫,甚至轉化為正能量幫助其他人,令節目多一層意義。

自從做咗呢個節目,我已較少放長假,約人食晏永遠要約十二點甚至更早,一點半就趕去開咪。朝早開咪前睇報紙我只睇標題,盡量唔好影響自己嘅分析,夜晚再重溫人哋嘅睇法,互相對照。日日如是,永不言倦。

節目已經做咗兩個十年,我經常提醒自己要配合時代不斷革新。頭先講起我有媽咪粉絲,甚至將來有人嘅爺爺嫲嫲係節目擁躉,我全部開心歡迎,不過最大心願係能夠做到有三代粉絲。我唔係要圈粉,而係任何人喺任何年齡都要管理財富,如果我能夠兼顧三代不同嘅投資需要,咁就證明節目真正做到與時並進,可以再邁向另一個十年。

陸叔攝於人生交叉盤十周年派對上,轉眼已到二十周年。