為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2019 年 05 月 02 日

陳同佳坐多半年 《逃犯條例》宜果斷暫緩

引發政府修訂《逃犯條例》的「港青年陳同佳涉嫌在台灣殺害女友案」,高等法院本周一就佢潛逃返港後干犯嘅「洗黑錢」罪,判佢監禁二十九個月,扣除三分一假期,再加埋已拘留十三個月,即係仲要坐多半年,到十月左右先放監。

有泛民議員認為,陳同佳未如外界所料即時獲釋,令政府早前要急於五月修例嘅迫切性消失晒,立法會起碼仲有六個月時間慢慢審議。有商界立法會議員認為,上周日上街抗議修例的人數比意料中多好多,反映公眾對修例感到疑惑不安,政府宜暫緩行事,從長計議,不應倉促於七月前完成修訂。

反對政府硬推修訂《逃犯條例》激發萬人上街,民陣話有十三萬人,警方就公布有二萬八千人,不論邊個數準啲,都係近年罕見嘅大規模遊行示威,更加係特首林鄭月娥上任後,遊行人數最多嘅一次。上街抗議嘅,唔止遊行示威常客,仲有大批普通市民,可見修例唔止商界不滿,普羅大眾都憂慮影響深遠,不滿情緒蔓延整個社會。

但係部分親政府人士繼續發表「挑機」言論,行會成員兼資深大律師湯家驊日前接受電視訪問,稱批評「反對聲音都是政治口號」,又話即使遊行人數多,政府都不應讓步;隨即遭市民狂插,話出身公民黨嘅佢,退黨之後無晒政治智慧。

雖然反對修例嘅火頭四處點起,但當局並未死心,催促部分建制派議員於本周二在立法會舉行第二次討論《逃犯條例》法案委員會上,繼續出招防止拉布,重點係針對民主黨議員涂謹申拖延選主席。

建制派上次開咗兩小時會議,可謂處於捱打狀態,今次將會醞釀新招反擊,預計會擔任法案委員會主席嘅謝偉俊透露,將會喺隨後嘅內務委員會上就選主席嘅程序、限期及方式提出指引,唔會無限期畀泛民拉布,「內委會有角色可以採用合適方法處理,不過預咗到時泛民又會呱呱嘈!」

謝偉俊亦估計,如今陳同佳繼續收監,泛民千方百計阻撓選主席嘅誘因細咗,或會暫時收手,待選出委員會主席後再玩過也不定。

不過即使泛民鬆章,讓主席順利誕生都唔代表一天光晒,佢慨歎近日拉布已阻咗唔少時間,預計法案委員會喺七月中會期完結前完成審議嘅機會愈來愈細,直言「餘下時間根本做唔切,惟有盡力而為。」

周日出現近年罕見的萬人上街抗議修訂《逃犯條例》,反映市民十分關注修訂條例存在的問題。

 

林鄭月娥(右一)打算將《逃犯條例》擺上立法會硬闖,唔少議員表示仍有疑慮。

 

民主派議員不惜與建制派硬撼,圖阻立法會七月休會前通過修例。