為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2019 年 05 月 05 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

閨密私語

人生難得好閨密,既有共同話題,又可分享秘密。今次「Paco巨星飯堂」嘅嘉賓:王子涵(Ada)同莊思明(Lisa),就係圈中其中一對閨密,感情相當要好。

我帶呢一對閨密,去到位於尖沙咀嘅「鐵板燒海賀」,品嘗高質素嘅日本料理,細說佢哋嘅閨密情。

Ada同Lisa相識已久,但講到成為閨密,機緣就係去年喺劇集《丫環大聯盟》中合作,令佢哋發展出深厚友誼。

共同偶像

講到對方,Ada同Lisa都有意見發表,前者表示:「我同Lisa認識咗好耐,但係都只係點吓頭say吓hi嗰隻,直到去年拍TVB劇集《丫環大聯盟》,我哋比較多對手戲,於是多咗機會傾偈,咁就拍出真感情,哈哈!」

Lisa立即補充:「我哋傾傾吓,先發現大家有同一個偶像,就係舒淇!而且我哋欣賞舒淇嘅觀點都差唔多,鍾意佢對事業下嘅苦功,仲有手到拿來嘅演技⋯⋯其實我哋都以佢為目標o架!」

既然同以影后為目標,佢哋對自己嘅演藝事業,自然充滿熱誠。Lisa話:「平時啲人覺得我講嘢細細聲,好似好斯文咁,其實我好想演反派角色,最好係有啲竭斯底理嗰隻。除咗因為我覺得有好大發揮,我仲想做一啲同平時好大對比嘅事。」

Ada就有完全唔同嘅夢想,「我仲有啲少女情懷,所以想演啲浪漫愛情小品嘅女主角,做吓啲浪漫嘅事,就算演戲都好啦!」

我帶兩位嘉賓,去到位於尖沙咀嘅「鐵板燒海賀」,品嘗高質素嘅日本料理,細說佢哋嘅閨密情。

 

為《愛.回家》一員嘅Lisa,早前同一眾戰友Re-U,相當有情。

 

Ada同Lisa啱傾,同二人都視舒淇為偶像,大有關係。

 

季節推介刺身9款($1,280),全屬時令食材,包括原條池魚、吞拿魚腩、海膽、平政魚、依佐木魚、金目鯛、白象拔蚌及左口魚。

 

海賀鮑魚焗飯($1,280/四人用),鮑魚嘅鮮味滲透入飯粒,屬必食菜式。

 

原隻紫海膽佐富山白蝦及三文魚子($350),鮮甜嘅配搭。

 

愛重口味

哈哈哈!即使對事業上心,Lisa一講到男友楊明同二人婚期,都變得甜絲絲。「哈哈!我哋已經有共識o架嘞!我都唔等得好耐啦!不過佢仲未買求婚戒指,等佢買咗先啦!」
講到男友,Lisa笑得特別燦爛,「我好鍾意食重口味嘅嘢,所以好鍾意食印度菜。以前有唔少男朋友,都俾我拉去食印度菜食到怕,最終嚇走晒。但佢陪我食,仲食得好開心添!」

因為喜歡重口味,Lisa連拿手菜式都屬濃味系列。「我比較少煮嘢食,但煮麻婆豆腐就好有信心,一嚟自己鍾意食,二嚟我跟過鼎爺,學煮呢道菜,佢教我分兩次埋芡,咁啲豆腐就唔會出水嘞。之後我每次煮呢道菜都好成功,久而久之就建立咗信心。」

唔好睇Lisa外表斯文,其實佢喺飲食上偏向重口味,更曾因而嚇走唔少追求者。

 

Lisa同楊明拍拖多年,講到婚期女方都自言:「我唔等得好耐o架咋!」說時一臉幸福,大家明啦!

 

壽司長精選壽司($680),由壽司長精選每日最鮮食材炮製,日日不同。

 

鱈場蟹腳雲丹燒($450),集鱈場蟹及海膽之味,十分豐富。

 

家常廚神

正在拍攝重頭劇《唐人街》嘅Ada,雖然暫時少有時間下廚,但十幾歲就到英國留學嘅佢,原來都有唔少心得,「因為喺外國讀書,如果唔自己煮就分分鐘冇得食,所以我煮家常小菜係OK嘅,蒸水蛋、蒸魚、炒菜係最基本嘅菜式。

「唔好睇少最簡單嘅蒸水蛋,呢啲先係最考工夫!坊間有好多蒸水蛋嘅recipe,而我嘅蒸水蛋,蛋同雞湯嘅比例係1:1,味道同蛋汁嘅濃度啱啱好,所以我對煮呢道菜係最有信心嘅。」

正在拍攝劇集嘅Ada,表示其夢想成為浪漫情懷作品嘅女主角,祝佢早日夢想成真。

 

雖然有個知名爸爸,但Ada仍然默默耕耘,靠自己努力喺演藝圈打拼。

 

除咗煮家常小菜了得,Ada亦熱愛運動,動靜皆宜。

 

鐵板赤甘鯛金鱗燒($280),味覺層次分明。

 

A5宮崎極級和牛柳($1,080),牛柳嘅脂肪與肉比例剛好,經鐵板燒後更見惹味。

 

澳洲羊扒($480),令人回味。

 

鐵板燒海賀
地址:尖沙咀彌敦道100號The One 19樓
電話:29722888