余文樂快閃買玩具

余文樂（樂仔）嘅台籍老婆婆王棠云，去年五月就為佢誕下囝囝Cody；之後，樂仔就變咗做「奶爸」，一講囝囝即刻話題多多；而為咗見Cody多幾面，佢仲專揀留港嘅工作先至接。

樂仔同東姑坦言︰「o依家工作時，會成日同個仔face time，一見唔到面，就會好痛苦，好似苦戀咁；所以盡量揀啲戲都唔出埠嘅，喺香港嘅先會拍。」
其實，樂仔不但愛錫自己個囝囝，連其他小朋友，佢都一樣錫到燶。早前，佢就帶咗個小朋友去到深水埗買玩具，期間佢就同小朋友講︰「只可以揀一份，唔可以揀兩份喎。」佢仲踎低幫小朋友攞玩具，十分體貼。

由於附近嘅街坊見到明星大駕光臨，於是蜂擁而至，不停影相及集郵。唔知，樂仔係怕造成混亂，抑或係想趕住返家做湊仔公，所以佢只係留咗幾分鐘，快手快腳買完嘢就走人。

樂仔帶小朋友到深水埗買玩具，而佢對呢個小朋友嘅態度非常親切，仲成個慈父咁款。

玩具店內嘅客人，爭相上前搵樂仔影相及攞簽名。

樂仔走在深水埗嘅大街，即時引來大批街坊圍觀。

期間，樂仔更加踎低身為小朋友攞玩具，照顧有加。

同小朋友買完玩具後，樂仔就由司機接送回家。

對住自己個仔，樂仔不但做「奶爸」，仲孭住Cody出街，又會餵佢食嘢，認真廿四孝。