為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2019 年 05 月 01 日

黃智雯一隻狗打破隔閡

前年播出嘅劇集《降魔的》大獲好評,最近,無綫再以原班人馬開拍續集《降魔的2.0》,女主角繼續由黃智雯(Mandy)擔正,仲同上集一樣飾演急症室醫生。不過,唔同嘅係,今次劇入面,佢會有隻由鄭詩君(C君)飾演嘅精靈,守護住佢。

日前,東姑就喺新蒲崗撞見佢哋拍外景,除咗Mandy、C君之外,仲有「大小姐」林淑敏,場戲就係講劇中做記者嘅「大小姐」,懇求Mandy接受訪問,但係就畀Mandy狠狠咁拒絕。

相信因為Mandy同C君,場場都係對手戲,兩個人睇落好熟絡,未埋位前一路有講有笑。反而主力拍《愛•回家之開心速遞》嘅「大小姐」,今次只係客串性質,睇落同大家有啲格格不入之餘,仲拎住劇本喺度猛刨,比較起兩個對手,表現得份外認真。

其實,喺無綫入面,Mandy都出晒名份人「腍善」,容易相處。咁啱拍攝空檔,就有狗狗主人帶愛犬嚟附近散步,Mandy、C君、「大小姐」於是一齊圍埋去玩狗,本來冷淡嘅氣氛即刻變得好熱鬧。而東姑所見,Mandy對小動物仲好有愛心,伸手摸吓狗仔同佢玩時,充滿童真。唔怪之得,Mandy早前喺社交網上載一張佢讀小學時嘅童年照,頭紮孖辮,個樣同o依家嘅佢分別都唔太大,相信係童心未泯,所以樣都冇乜大轉變喇!

三人為無綫新劇《降魔的2.0》開工拍外景,Mandy今集繼續做醫生,身邊多咗隻精靈(C君),而「大小姐」就客串飾演記者,求Mandy接受佢訪問。

 

拍攝之前,三個人先試位兼排戲,「大小姐」仲表現得寧舍緊張,一路揸住劇本喺度對戲。

 

場戲係講飾演醫生嘅Mandy,狠狠咁拒絕「大小姐」嘅邀請,唔肯做訪問。

 

拍攝空檔,大家見到可愛嘅狗狗即刻打破隔膜,圍埋一齊大講湊狗經。

 

性格隨和嘅Mandy,不但同人易於相處,對狗狗亦都好有愛心,摸吓玩吓,好快同狗狗熟絡。

 

表面漫不經心嘅Mandy同C君,其實都好緊張表現,拍完一take即埋mon睇番playback。

 

小時候嘅Mandy,五官標緻,紮埋兩條孖辮,就顯得更加精靈可愛。