有質素嘅劇集，自然有大把捧場客！近期熱播嘅TVB劇集《鐵探》，就係最新嘅例子。劇情絲絲入扣，經過一眾演員嘅高水準演出，更見精采。

今次「Paco巨星飯堂」，我就請嚟三位劇集「鐵腳」：袁偉豪（Ben）、蔡思貝同王君馨（Grace），去到位於銅鑼灣嘅「老沸爺火鍋」，品嘗特色火鍋，大談劇集拍攝嘅點滴。

喺劇集《鐵探》中愛恨交纏嘅Grace同阿Ben，飯敍時都相當入戲，鬼馬互動，歡樂氣氛都感染埋思貝。

實力派雲集

劇集除咗有三位嘉賓瞓身搏命演出，最矚目就梗係有影后惠英紅同另一演技派姜皓文坐鎮。而思貝就遺憾表示：「其實我好不幸，因為我同黑哥、紅姐好少戲，得啲群戲。初頭收到劇本，通知要拍嘅時候，我好期待，心諗可以同紅姐做對手戲，後尾知道原來係多群戲，所以都覺好可惜。

「不過可以喺現場，感受佢哋股強勁嘅氣場，從中我都學到啲嘢。我好羨慕阿Ben，因為佢同兩位前輩有好多對手戲。」

被點名嘅阿Ben，都表示能夠有機會同神級演員合作，十分榮幸。「喺紅姐同黑哥嘅身上，我學到好多嘢，加埋Benz哥（許紹雄）等前輩，令我更加希望可以做到佢哋咗收放自如。」

雖然Grace未有同前輩們同場，但佢話今次都係佢拍劇以來一大突破。「雖然現實生活中，我未做人媽媽，但拍劇就終於第一次演媽咪，有一個六歲嘅女，經手人就係阿Ben。好多人話同小朋友演戲，係好高難度嘅事，但我好好彩，搵到同我合作嘅小演員溝通嘅方法。首先唔好用小朋友腔同佢講嘢，要當佢係平輩；然後佢同我一樣好鍾意跳舞，佢排咗隻新舞又會俾我睇，有共同語言，我同佢好快融合到。」

我帶三嘉賓去到位於銅鑼灣嘅「老沸爺火鍋」，品嘗特色火鍋，大談劇集拍攝嘅點滴。

集紅姐、黑仔兩大公認演技派，劇集嘅戲味自然有保證。

 

餐廳以放題形式吸客，平日$288一位，星期六及公眾假期另加$10，又以足料燉湯作招徠，有多款鴛鴦湯底供食客選擇，包括麻辣鴨血湯及酸菜白肉湯，性價比極高。

火鍋配料選擇豐富，而且質素甚高。

湯底另有黃金蟲草花花膠雞煲翅湯鍋，及足料卜卜花甲龍蝦濃湯鍋，選擇相當多。

速減20磅

而劇中飾演絕症病患嘅阿Ben，話角色由於頭部中槍後，患上創傷後遺症，有失禁、鼻流腦漿等慘況，「為咗將呢種病入膏肓嘅狀態完美呈現，我需要喺三個月內減20磅，仲要喺十日內脫水，至達到嗰種消瘦。

「我諗喺我人生入面，都冇試過咁樣減磅法，嗰個磅數基本上係我十八歲，又或者再細個啲讀緊書嘅磅數嚟。而喺拍緊劇嘅時候，得劇組、台前幕後嘅同事知我做緊乜嘢，但係完咗套劇之後，啲人就覺得我有病，因為我唔能夠一次過肥番晒。」

喺禁食過程中，阿Ben只可以食淡而無味同極少量嘅食物，「直情係維持生命餐！早餐食粟米片、烚雞蛋同飲一杯咖啡；到後期就將隻烚雞蛋放喺午餐時間先食；晚餐就煎一個番茄食。不過，有時我都會偷偷地食蛋撻、菠蘿包，等自己有啲甜嘢落吓肚！」

阿Ben為套劇激減廿磅，拍攝時只有一百四十磅，非常專業。

Grace同飾演佢戲中囡囡嘅小演員Vincci，喺戲外都玩成一片。

拍攝高空戲份，思貝主動向監製要求親身上陣，值得讚賞。

同劇仲有楊明、張寶兒等演出，人材濟濟。

另一燉湯海底椰百合響螺頭龍骨湯鍋，潤肺止咳，味道清甜。

燉湯雪燕桃膠皂角米膠原三寶養顏烏雞蔘湯，燉足四小時，十分滋補。

高樓考演技

因為劇中演出同造型，思貝備受讚賞，佢表示：「呢個角色有創傷後遺症，細個差啲俾人強姦，之後佢點樣出返嚟做事，最後佢竟然選擇做警察，仲做埋臥底，角色寫得好立體。

「劇中好多動作戲，都係我自己做番，有啲情節講我吸食唔同嘅毒品，我之前做晒功課，上網research晒吸食之後嘅反應，練習過先去拍。而我最深刻嘅一場戲，係講我做番警察之後，喺大廈天台遇番嗰個強姦犯，仲會同佢墮樓，墮樓嗰part我都自己去做，要兼顧演戲同動作，完成之後都好有滿足感。」

同為港姐出身，又同樣喺外國生活過，令思貝同Grace同聲同氣，成為好友。

安格斯牛頸脊（$128小/$228大），屬另外收費配料，入口質感及味道自然高一個層次。

特定海鮮類配料需另外收費，詳情可向餐廳查詢。

老沸爺火鍋
地址：香港銅鑼灣堅拿道西10號冠景樓一樓B號舖
電話：23616818 / 23616918