為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2019 年 04 月 21 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

潛藏高手

高手點止在民間?只睇一個娛樂圈,都已經係臥虎藏龍!今次「Paco巨星飯堂」,我就請嚟近日喺熱播劇集《鐵探》中,表現甚為搶Fo嘅林偉同白雲,加上後者嘅閨密阮兒(Chloe),三人除咗喺演技上有番咁上下,喺飲食上原來都係低調高手!

我帶三位高手,去到位於上環嘅「葫越」,品嘗具風味嘅越南美食,暢談飲食經。

Chloe、偉哥同白雲為演藝界默默耕耘,娛樂大家,但其實佢哋除演技了得外,講飲講食一樣係高手嚟o架!

 

《鐵探》結緣

一坐低,偉哥已經話:「我喺新劇飾演越南僱傭兵,同Paco又喺越南餐廳飯敍,真係同越南特別有緣!」

哈哈哈!真係事有湊巧,亦因為新劇《鐵探》,偉哥同佢嘅「肉參」白雲認識,後者表示:「雖然我喺劇中俾偉哥綁架,又餵我食毒品搞到我跳橋,但係拍嘅過程好開心,偉哥同成班crew都好nice。至於跳橋,對我嚟講係OK嘅,一來我冇畏高,二來安全措施都做到足,加上我係比較好動嘅人,所以呢次係一個好好嘅經驗嚟嘅。」

劇集播出後反應熱烈,偉哥同白雲兩位「打頭陣」嘅演員,固然高興,而兩位嚟緊仲有新嘅工作接住嚟,各有各忙。偉哥話:「我o依家拍緊TVB另一部劇集《唐人街》,另外仲有啲內地嘅網大。」

白雲就驛馬星動,為綜藝節目《3日2夜》擔任新一輯嘅主持。「我會去台灣澎湖,出發前我就做定功課,知道當地以陽光與海灘聞名,我鍾意戶外活動,特別係潛水,我諗嗰度一定好啱我!」

我帶三位嘉賓,去到位於上環嘅「葫越」,品嘗具風味嘅越南美食,暢談食經。

 

白雲同偉哥因近日熱播嘅劇集《鐵探》結緣,雖然幕前情節驚險,但幕後氣氛融洽。

 

 

 

越南滴漏咖啡($23),其咖啡豆由越南直接入口,風味滿分。

 

牛油果沙冰($35),用新鮮牛油果即叫即製,香滑又清新。

 

自創特色雞中翼($39),以自家研發嘅秘製醬料製作,雞翼經油炸後再炒香,味道獨特,坊間少有。

 

荷蘭地膽

講到《3日2夜》,白雲嘅好姊妹Chloe,亦為節目向「祖家」荷蘭出發。「我喺荷蘭土生土長,到十八歲先嚟香港,今次為拍節目返去,梗係要向觀眾介紹多啲外地人無咁熟悉嘅當地特色!

「一般人對荷蘭嘅印象,都係風車同木屐,喺呢兩樣嘢之外,其實仲有好多特別嘅地方o架。以食嚟講,荷蘭人好鍾意食麵包,早餐通常係芝士加麵包。我好鍾意食當地嘅小食Croquette,有啲似炸薯餅,但餡料有好多種類嘅,所以我返嚟香港嘅時候,都幾大隻o架!」

一講家鄉美食,Chloe如數家珍,「因為荷蘭沿海,所以海鮮都好出名,其中最有特色嘅係Herring(鯡魚),特色係當地人嘅食法,佢哋會生食,不過因為呢種魚好腥,所以會配洋蔥同酸瓜食。傳統食法係拎起條魚,顎高個頭然後放條魚入口,咁樣食可以再減低腥味。」

白雲(左)同Chloe份屬好閨密,嚟緊佢哋為J2綜藝節目《3日2夜》分道揚鑣,一個去台灣澎湖,一個回歸「祖家」荷蘭,將最具特色嘅行程,同觀眾分享。

 

熱愛深潛嘅白雲,不時喺IG跟網友分享潛水片段。

 

愛唱歌嘅Chloe,不諱言上月出任《流行經典五十年》嘅嘉賓後,多咗登台演出嘅機會。

 

於荷蘭土生土長嘅Chloe,話去到當地一定要品嘗以薯仔製作嘅croquette(當地寫法為Kroket、上圖);另外配上洋蔥及酸瓜食鯡魚(Herring、下圖),係荷蘭獨有嘅食法,都係必試嘅特色美食。

 

 

 

牛油果沙律米紙卷($29),選用當天新鮮嘅牛油果及蔬菜製作,米紙由越南直接入口,夠晒原汁原味。

 

越南法棍三文治($38),材料包括直接由越南入口嘅扎肉及扎蹄,配上已醃製嘅紅、白蘿蔔,更有口感。

 

食盡天津

來自天津嘅白雲,被Chloe感染,大講家鄉美食,「天津美食最大特色,係早餐種類多,配搭組合可以食足一個月,都唔會重複!我就特別推介煎餅果子、芝麻燒餅同老豆腐。煎餅果子嘅外皮係用綠豆磨成漿製作,然後加蛋加脆餅,包埋嚟食,味道層次好多!

「芝麻燒餅入面可以夾唔同嘅餡,我就覺得夾茶葉蛋就最好味!老豆腐好似豆腐花咁,不過味道就係鹹嘅,質感都係滑。」

偉哥對食就以蒸為上,「我媽咪以前做包伙食嘅,所以我都有幫手。o依家唔使出去應酬嘅時候,我鍾意食得清淡啲,蒸吓魚、排骨,再整個菜就好夠。」

除咗本地嘅電視劇,偉哥近年轉戰內地,接拍唔少網大,開拓自己嘅演藝空間。

 

講到家鄉美食,白雲表示天津嘅早餐配搭豐富,搭配出嘅組合可以於一個月內都唔會重複!佢嘅精選推介則係,外酥內軟嘅椒鹽芝麻燒餅(上圖),佢話夾茶葉蛋食最滋味;另外以綠豆製嘅煎餅果子(右圖),都係不得不試嘅天津早點。

 

扎肉手撕雞湯河粉($78),鷄湯用雞骨及雞殼熬製而成,鷄肉則以人手一條條撕出,令雞絲更有口感。

 

葫越春卷($39)嘅春卷皮由越南直接入口,餡料為豬肉及新鮮蔬菜,外脆內juicy。

 

牛魔王湯河粉($88),採用美國安格斯牛肉及當日新鮮嘅崩沙腩、生牛肉、牛肋條、牛筋、牛柏葉等製作,湯底用上大量高質素嘅牛骨,加上數種藥材及越南香料,經過十五小時熬製而成,為心機同誠意之作。

 

葫越
地址:上環蘇杭街57號AKVO酒店地下
電話:26680398