為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2019 年 04 月 18 日

《逃犯例》法案委會報名限三日 議員轟政府打茅波

修訂《逃犯條例》爭議聲不絕,近日立法會秘書處就召開相關法案委員會一事,向議員發出通知,決定本周三(十七日)開第一次會議,所以只有三日時間,畀議員決定是否加入法案委員會,跟以往有一個星期時間畀大家考慮嘅做法好唔同。

泛民收到通知後反應極大,對政府為立法不惜急就章極為不滿,已向秘書處作出投訴。民主黨立法會議員林卓廷嬲爆話:「得三日報名,仲要橫跨周六、周日,做法好唔尋常。講真之前公眾諮詢期得嗰二十日就話問晒各界意見,好多商會根本未畀意見就截咗止,政府為咗想盡快通過條例,搵台灣單兇殺案做藉口,其實係想中門大開,方便第日移交逃犯去內地。」佢仲話星期三首次法案委員會會議上,一定會提出抗議。

有議員更轟政府打茅波,用盡方法包括縮短報名期,目的只想盡快喺七月前通過修訂《逃犯條例》,完全唔理各界仲有好多疑慮。其中民建聯亦有唔少意見,佢哋認為保安局早前雖然已剔除九條與商業有關嘅罪行類別,但就冇設下追溯期,令商界仍擔心早期罪行亦會遭到翻舊帳,認為政府如果明確訂明以「三年、五年」為限嘅話,先有機會可以令法案順利通過。

內務委員會主席李慧琼就話,「上周立法會開內務委員會,商討修訂《逃犯條例》的法案委員會第一次會期時,秘書處都係按議事規則,按當時在場有份舉手表態加入嘅議員中,年資最深嗰位議員拍板決定日期。結果因為定咗十七號開會,再扣減秘書處要一個工作天整理相關文件,才會出現只得三日時間畀議員報名。其實三日報名期以往都試過,唔係第一次。」

有建制派副班長之稱嘅民建聯副主席陳克勤亦話,雖然只得三日,但報名程序可以上網搞,所以佢覺得可以接受,而民建聯全數十三人會加入,預料建制派會空群出動加入,確保取得控制權。

據知報名期在本周一(十五日)午夜截止,而截至周一上午十一時,已有六十名議員報名加入。人數就建制派有三十六人,剛超過一半,相信仲有人會趕喺半夜前報名。

政府心急修訂極富爭議的《逃犯條例》卻欠缺足夠諮詢,惹來社會各界反對聲不斷。

 

林卓廷指三日報名期太倉促,轟政府「處理手法好唔尋常。」

 

李慧琼透露當日內委會上是由資深議員提議十七號開會,秘書處惟有縮短報名期配合。