為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2019 年 04 月 14 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

全萌做狗

復活節假期將至,自然係合家歡嘅黃金檔期,即將上映嘅動畫《女皇哥基大冒險》(The Queen’s Corgi),集結城中首度配音嘅組合,加上具份量嘅羅蘭姐同黃百鳴,聲演一個關於萌爆狗狗嘅故事,為一家大細提供高品質享受。

今次「Paco巨星飯堂」,我就請嚟四位首度配音嘅演員:張彥博、吳千語、劉浩龍同栢天男(Adam),去到位於將軍澳嘅「養心殿台式養生火鍋」,品嘗高質素又有特色嘅火鍋料理,暢談首次聲演嘅點滴。

喺即將上映嘅動畫《女皇哥基大冒險》中,同為首次配音嘅阿博、千語、師兄同Adam(左至右),全部聲演可愛嘅哥基,為一家大細於復活節期間,提供最佳嘅合家歡娛樂。

 

初試啼聲

既然全員都係首次配音,感受定必特別多,聲演主角Rex嘅阿博就話:「我今次第一次演繹隻狗,仲係羅蘭姐隻狗,其實好特別,因為之前同羅蘭姐都合作過拍劇,最好笑係佢唔知我係佢隻狗!同埋我喺戲入面,會唱歌俾千語配音嘅Wanda聽。」

千語表示:「Wanda係好靚嘅狗狗,喺寵物收容所裏面,一出場我係唱住歌、跳住舞,艷壓四方。一開始我係百鳴老闆配音角色嘅大哥個女朋友。大哥蝦蝦霸霸,對我都唔好,好臭脾氣,好霸道、好專橫。直至遇到Rex,發現佢好有正能量、好正義,於是飛咗大哥,唔驚有後果。」

首次配音,阿博同千語都有雷同嘅感受。「同唱歌好唔同,但有個共通點,係丹田都係要好用力,同埋開頭我要搵個聲嘅質地,都用咗四十五分鐘,同導演陳心遙去tune嗰把聲,(師兄:「咁啱嘅,我都係用咗四十五分鐘。」)導演想我用嗰把聲同keep住個力,最初我都試咗好多唔同語氣俾佢聽,等佢揀。佢用唱歌比喻去解釋,因為我試過喺錄音室錄歌,但未試過咁長時間講對白。我由早上九點鐘錄到半夜十二點,好攰!」

千語大表贊同:「我覺得攰過拍戲!」

我帶四位嘉賓,去到位於將軍澳嘅「養心殿台式養生火鍋」,品嘗高質素又有特色嘅火鍋料理,暢談首次聲演嘅點滴。

 

故事以英女皇嘅愛犬作藍本,所以女皇都有登場,負責為女皇「發聲」嘅,仲係德高望重嘅羅蘭姐;而電影公司老闆百鳴哥,都有獻聲演出,全情投入。

 

麻辣鍋($128),以秘方調製湯頭,再加入台灣直送嘅鴨血同凍豆腐,極具特色。

 

招牌鹵味拼盤($118),夠晒入味!

 

寧神養心鍋($168),以川芎、白芷、天麻、當歸、鮮雞、豬肉及二十斤鮮魚,餚製四小時而成,相當滋補。

 

名師指導

另一組「新鮮人」師兄同Adam,都表示享受配音過程。師兄話:「都幾開心o架,因為我恨咗做呢件事好耐,之前拍電影配番自己把聲就多,甚至試過為國語片配廣東話,但配卡通片就係第一次。我發現原來同拍戲一樣,都要好信任導演,因為我冇得睇晒成套戲,所以每場戲佢會解釋番,教我點做、點用把聲,我覺得係好玩嘅。

「同埋我同導演心遙,喺好耐之前已經認識,我有幾隻歌係佢幫我填詞嘅,經過咁多年再合作,佢成為咗導演,最終錄完音佢話,不如大家夾番隻歌,我就話都好喎。」

喺澳洲長大嘅Adam,為咗今次都下過一番苦功。「可以話係over-prepared,因為演狗呢個角色,我以為有機會要吠,但我唔知Corgi點樣吠,所以我猛咁睇youtube啲Corgi係點吠,仲學咗半日。點知原來部戲係唔使做呢樣嘢,導演叫我做番個角色就得!

「不過,我都學到好多新嘢,當keep唔到配音嗰把聲,我個manager同我講,食啲糖會有幫助,因為甜嘢可以潤一潤喉,但錄到尾時,我已經識得hold住把聲。」

雖然分開配音,但聲演情侶嘅阿博同千語,一樣全力以赴,二人都表示配音比演戲難度更高。

 

師兄大讚配音導演陳心遙(中)才華洋溢,不論編劇、填詞同配音都應付自如。

 

戲中嘅狗狗外表可愛,加上認真嘅製作,令可觀度更高。

 

手切牛肉($338大/$238小),為每日限量供應嘅配料,肉味濃厚。

 

餃子拼盤($118),除魚皮餃外,全為自家製作品,包括極品水餃、鮮蝦雲吞、水蓮餃、韭菜餃及麻辣牛肉餃。

 

無辣不歡

今次品嘗麻辣火鍋,師兄同千語就最興奮,由肥仔變型仔嘅師兄表示:「我好鍾意食辣,仲係無辣不歡嗰隻。o依家我食嘢無顧忌,因為我日日都會做運動。我本身係易肥底,之前去日本旅行,就肥咗八磅返香港,但係一開始做番運動,好快又瘦番。」

千語同樣係「辣妹」,「我喺內地做嘢,好多時都食辣,我就好鍾意食,啲同事同我一齊食,仲由食唔到辣變成食到添!」

飯敍當日,千語仲主動要求加辣,絕對配得上「辣妹」之名!

師兄話自己於正式配音前,先收到對白,而不諳中文嘅Adam,就獲「優待」事先收到對白做功課,前者為此大表羨慕。

 

有造型神似嘅女皇,戲內仲有一睇就知係美國總統夫婦嘅角色,完全係神還原真實人物。

 

 

 

手工丸類拼盤($108),包括鵝肝墨魚丸、黑松露蝦丸、芝士牛肉丸、墨魚丸、蝦丸及梅菜豬肉丸。

 

台灣翠絲水蓮($88),由台灣空運到港,千語不停encore嘅配料。

 

厚脂黑毛豬梅花肉($168),肉嫩並且無膩感。

 

養心殿台式養生火鍋
地址:將軍澳唐德街3號香港九龍東智選假日酒店Pop Deli 2樓
電話:25255299 / 25255929