為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2019 年 04 月 14 日

姚嘉妮索人妻持家有道

現年四十歲嘅姚嘉妮,雖然早喺十三年前嫁咗畀前亞視藝人林祖輝,兩人仲育有一子一女,但作為兩個小朋友嘅媽咪,佢保養得宜,身材完全冇走樣。早前,佢仲喺無綫新劇《她‧她‧她的少女時代》,拍攝一場着泳衣嘅落水戲,大騷佢fit爆嘅身形,更乍現馬甲線。

佢keep得咁fit,難免令東姑都好奇,佢日常起居飲食嘅生活,係點樣保持身材苗條?早前,東姑就喺西貢發現佢嘅蹤影,全身黑色衫裙,戴埋黑色cap帽,左孭住個手袋、右孭住個購物袋,好頻撲咁趕去銀行搞戶口、財務嘅嘢,睇嚟持家有道嘅佢,應該係屋企嘅財政大臣。

之後,佢再去附近行超市,全程睇多過買,似係「師奶仔」喺度格價,相信佢平時一定精打細算。最終,佢就淨係買咗一包餅乾,然後自己揸車返回電視城開工。睇嚟,人妻人母嘅佢,生活其實都係平淡是褔。

姚嘉妮喺〇六年下嫁林祖輝後,誕下一仔一女,大女煦錡今年九歲,而細仔璟豪今年就六歲。

 

成身黑衫黑帽嘅姚嘉妮,行到氣急敗壞,匆匆忙忙,好似好趕時間。

 

排隊去銀行辦理財務事宜嘅姚嘉妮,足足喺銀行搞咗近一個鐘,為日常瑣碎事忙碌。

 

之後,佢去咗一間超市閒逛,仲十足格價專員咁,好留意啲貨品嘅價錢牌。

 

雖然姚嘉妮既係人妻又係人母,但都係職業女性;跟住,佢就揸車趕返去電視城開工喇!