為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2019 年 04 月 13 日

馬國明片場親善大使

邵氏製作嘅網劇《飛虎2之雷霆極戰》,除咗苗僑偉(三哥)、黃宗澤(Bosco),以及吳卓羲原班人馬之外,仲加入咗幾個強勁嘅新人,包括:馬國明(馬明)同苟芸慧(苟姑娘),佢哋就飾演一對夫妻。劇中,馬明係俗稱「狗仔隊」嘅刑事情報科督察;而現實中,去年剛剛嫁咗畀富貴賽車手陸漢洋、榮升人妻嘅苟姑娘,就喺劇入面做番人妻角色,演馬明嘅潑辣老婆。

早前,東姑就喺啟德一棟商業大廈,見到《飛虎2》嘅劇組喺度拍攝外景。當日,姍姍來遲嘅馬明,到達現場之後,即刻跟住工作人員趕去化妝換衫。佢完全冇架子之餘,仲急急腳行,似係好驚阻遲大家嘅拍攝進度。而出名好相與嘅佢,當日就同「老婆」苟姑娘及飾演下屬嘅劉佩玥有唔少對手戲。

東姑所見,佢走位排戲全程都表現得好gentleman,仲代勞兩個女對手同幕後溝通。最難得嘅係,化身埋片場嘅親善大使,鏡頭以外,無論同女對手苟姑娘、劉佩玥,以至同場配角演員,甚至幕後,佢都施展渾身解數,懶風趣咁講晒笑o氹大家開心,簡直好似片場開心果一樣。

相對另一邊,苗僑偉(三哥)同吳啟華兩大熟男,都有一場對手戲,佢哋睇起上嚟就嚴肅得多。拍攝空檔,吳啟華木口木面、三哥就掛住篤電話,連同場嘅康華都係自己玩selfie。對比有馬明場口嘅熱鬧同埋打成一片,認真相映成趣喇!

自己親自揸車到達現場嘅馬明,睇起上嚟好匆忙,落車即執埋包袱趕去化妝。

 

一場戲,馬明來來回回推玻璃門出入十幾二十次,而genlteman嘅佢仲負責同幕後溝通,排練走位。

 

平時天然呆嘅馬明,其實私下好鬼馬風趣,對住苟姑娘同劉佩玥,仲特別談笑風生,

 

無論對住現場嘅配角演員,抑或對住啲幕後人員,馬明都似十足親善大使,講笑搞氣氛。

 

麥長青(麥包)都喺現場,遇上馬明佢哋仲不知幾開心,埋位前四人先自拍合照一張;之後麥包繼續周圍搵人selfie。