為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2019 年 04 月 11 日

醫委會引外援表決甩轆 劉允怡被指箍票不力

公立醫院人手爆煲,促請放寬引入外援之聲不絕;醫務委員會大方向亦想放寬外援醫生來港條件,日前更就相關嘅實習豁免方法進行投票,誰知四個方案通通被否決,據聞連主席劉允怡自己都好意外。據了解,醫委會內事前有人數過,應有足夠票過關,點知臨門一腳慘遭滑鐵盧。追究甩轆責任,大家矛頭直指劉允怡,埋怨佢事前無做好箍票,甚至有失職之嫌。

拆解成件事來龍去脈,表面上不論政府、公院、私院及私人執業醫生對放寬外援都無乜大爭議,之不過各自內心都有把尺,真正想點未必會講出口。一年前醫委會改革,由醫管局及衞生署共四席代表中,各減一席畀「醫專」經直選產生後,形勢出現微妙變化,今次投票正正凸顯直選委員冇跟大隊投票。

較傾向政府的一方主張海外醫生「嚟咗先算」,即係支持外援可以喺公立醫院、衞生署或大學工作夠三年,並考獲執業資格就可免實習。此方案以包括衞生署及醫管局代表、兩間醫學院等代表支持最多,被視為「政府方案」。另一派就主張申請者需「綑綁留在醫管局工作三年」,呢個就被稱為「醫學會方案」,支持者以醫學界選出嘅委員,包括醫學會等代表最多。

有委員私下透露,論牌面計,支持政府方案的一方握住十六票,絕對夠票通過「政府方案」,但最後亦僅得十四票贊成,有兩票忽然「失蹤」,結果真係爭一票,過唔到。
部分委員透露,「失蹤」兩票就係醫專兩位直選委員,「醫專委員過去傾向較統一,但新增成員透過直選入來,投票意向自然跟前線多過跟大隊。」

此外,投票當日亦有兩名由醫專提名嘅委員鄧惠瓊及周雨發,分別以要教書及不在香港為理由缺席投票,「傾向政府方案嘅票數擺明掹掹緊,呢種情況一早可以預計到,作為主席應積極箍票,而唔係衰咗仲賴『有人講一套做一套』。」

呢場亂局引起輿論強烈反彈,直斥醫委會妄顧社會利益,不少委員想補鑊,傾向盡快成立臨時委員會或新工作小組重啟議題,仲要投明票表態,但至今未傾掂數。有委員認為,傾向政府方案的其實只差一票,下次再投時只要加多兩錢肉緊箍票,應該過到嘅。

放寬外援醫生無期,部分前線醫生坦言失望,希望當局盡快補鑊。

 

劉允怡對箍票甩轆一事解釋「有人講一套做一套」,他也無能為力。

 

二十九名委員以暗票方式表決,結果在沒有大爭議下,四個方案均被否決,何栢良(前)會後批評投票方式有問題。