為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2019 年 04 月 11 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

政策的落地與平衡

根據世界銀行數據,中國二○一七年工業增加值達到四點九五兆(現價)美元,全球排行第一;歐盟三點八六兆美元,美國(一六年)三點五二兆美元。我睇過一份資料,中國四九年時全國工業總產值只得一百四十億元人民幣,當時資料匱乏,呢個數字未知是否準確,但世銀數據顯示六○年時工業增加值只有二百六十五億美元,見得到中國喺改革開放之後逐步成為世界工廠。取得驕人增長,係所有投入工業事業嘅人努力成果,當中包括香港廠企嘅貢獻。

當然,快速發展嘅代價係出現環境問題和經濟增長失衡,因此政府提出《中國製造二○二五》,加入「創新驅動、質量為先、綠色發展、結構優化、人才為本」等方針,領導人亦多次強調「綠水青山就是金山銀山」。

我同意政策嘅本意,要喺發展、環保和增長質量之間取得平衡。事實上,內地早喺九十年代已經將可持續發展定為國策。而針對工業嘅環保政策,就由七十年代點源防治污染,到八十年代調整工業布局、產業結構,並改進技術和環境管理,以至九十年代推行清潔生產,由側重污染末端治理逐漸變成生產過程全面控制。

近年由於環保科技漸趨成熟,企業可持續意識增強,見到內地較有規模嘅工廠已經配合政策提高環保標準,但仍然不時聽聞廠家因為環保安全措施而出現生產停頓或干擾、罰款等。到底係做得不足定係另有原因?前者固然不能否定,但我與不同工業家傾偈,講起環保政策大家都有意見,主要係政策落地方面嘅問題。

改革開放初期,地方政府非常重視到內地設廠嘅工業企業,因為除咗帶來資金、納稅和提供就業外,仲帶來技術推動內地提升生產質素。有工業家講起,開放初期入內地買車,返嚟要拆晒啲螺絲再焊返實,唔係揸揸下可能會甩螺絲,到後期有外資入去開合資廠水平至慢慢提高。港商多年來亦培訓好多工業人才,間接幫助提高國內生產水平,可謂貢獻良多。

近年內地經濟起飛,有部分地方政府可能冇以前咁看重工業,甚至想以科技、服務、金融業取而代之。除此以外,亦有工業家反映,現時經營所面對嘅各種掣肘,並非政府政策原意,而係層層下達出現嘅不合理措施。有廠家聽聞,一個治理排污嘅政策,去到地方落地時,可能會變成一刀切搬移所有相關工廠嘅指令,並冇因應工廠具體環保標準而作出相應管治。

工業屬於二級產業,但分別支撐一級(農牧礦等)和三級(服務)產業,有學者分析製造業係創造財富嘅經濟部門,服務業則耗用財富,所以製造業係促進經濟發展重要一環。我認同工業係百業基礎,中國經濟不能單靠高端科技、房地產、金融等產業,因此衷心希望內地能夠理順工業發展和環保安全之間嘅平衡,地方亦能體察業界情況,令政策落地有方,工業與其他產業各司其職,經濟發展根基至夠穩陣,亦能達成幫助工業做好嘅政策原意。

工業係百業基礎,我希望內地能夠理順工業發展和環保安全之間嘅平衡。