為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2019 年 04 月 07 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

中式蘇Jazz

數香港唱Soul唱Jazz嘅招牌代表人物,我嘅好戰友蘇永康,一定榜上有名!嚟緊六月,佢即將再次踏上闊別七年嘅紅館舞台,舉行兩場個人演唱會,一於以多年嘅金曲,配上中西合璧嘅「新面貌」,回饋樂迷。

今次「Paco巨星飯堂」,我就帶阿康去到位於尖沙咀嘅「FINDS」,一邊傾佢嘅演唱會,一邊品嘗特色嘅北歐菜。

阿康即將於六月,喺紅館舉行兩場個人演唱會,以金曲會知音。

 

流行中樂

阿康於六月再踏紅館,演唱會取名《ALL THAT JAZZ(AND POP)LIVE》,新歌命名為〈ALL THAT JAZZ〉,擺明講父子情,指囝囝Jazz就係佢未來人生嘅重點,所以佢「錫身」嘅方式,就係養生。

「你睇幾多前輩,六十歲仲好有活力,我仲有大把時間。現代人養生係為咗將來,你都唔想年紀大會有好多狀況,所以我飲食、生活節奏一定要節制。」

講到演唱會,阿康表示:「今次有廣州中樂團,有成八十六人,連同西樂樂手,到時台上有接近一百人。因為我今年五十一歲,所以構思個show會係我嘅回顧史咁,從我喺樂壇出道第一首歌,唱到最後一首歌。

「平時啲Show請嘉賓會容易啲,但因為今次同咁多人合作,佢哋未必隨時起得到歌,因為佢哋都要睇譜,所以會有少少困難。不過,到時都會有嘉賓上台,其實我個人都幾貪心,好少會請重複嘅嘉賓,本身我有合唱歌,我會邀請一啲年輕嘅歌手合唱,唱一啲佢都可能未聽過嘅歌曲,例如有〈從不喜歡孤單一個〉,又或者〈來夜方長〉,睇吓到時會唔會擦出一啲新火花。」

我帶阿康去到位於尖沙咀嘅「FINDS」,一邊傾佢嘅演唱會,一邊品嘗特色嘅北歐菜。

 

事隔七年再踏紅館,除咗宣傳海報有心思,阿康嘅宣傳片仲請得「子華神」友情相助,

 

 

 

煙燻挪威鱈魚餅配北冰洋蝦沙律、煙燻鱒魚子、甜椒汁($168),來自挪威冰冷純淨海域嘅北極鱈魚,肉質鮮嫩,含有豐富Omega3脂肪酸而且熱量低,十分受歡迎。

 

北歐海鮮拼盤($398),以北歐常用嘅煙燻技術,炮製各式海鮮,包括漬帶子、刁草蝦、自家煙燻蝦、藍青口、甜蜆、冷燻三文魚、輕煎三文魚及醃三文魚。

 

挪威三文魚驚喜六重奏($198),採用挪威可持續發展三文魚製作,一次過品嘗六種不足風格嘅三文魚,包括冷燻、輕煎、慕絲、醃製、紅菜頭漬及煙魚籽。

 

顧家爸爸

除咗係實力唱將,阿康仲係實力派兼二十四孝爸爸,「喺我個仔身上,我睇到簡單會好快樂,其實呢樣嘢已經忘記咗,就係好直接嘅:你付出幾多愛,就有幾多回報。

「有次太太仲喺意大利,我啱啱公幹完返嚟,咁啱囝囝喺流感邊緣,發燒發到38度,又屙,醫生話冇39度唔好帶嚟,嗰兩日我喺屋企對住佢,好踏實地做一個父親要做嘅嘢,每隔兩小時探熱,留意poopoo有冇事。嗰吓我嘅形容係『痛並快樂着』,因為小朋友唔精神,你個心係唔舒服,所有父母都係,你(小朋友)嘅痛擺喺我度先;但係快樂着,佢真係全日一嚿棉花咁黐住你,好似咁耐以嚟都未試過。」

阿康仲話,婚姻同育兒一樣,要終生學習:「因為我四十九歲先生BB,嗰時太太都係四字頭,大家喺社會上工作咁耐,腦袋好多data塞到爆晒,但小朋友個腦好似海綿,到佢一歲幾開始學講嘢,我哋談話要非常之小心。

「最近佢開始講『嚇死人嘞!』,但我同太太都冇講,可能係工人姐姐講嘅,我哋聽到呢啲,首先嘗試改正佢,教佢多啲名詞好似『抱抱』嗰啲。而且我哋年紀大,要小心正確抱法,我太太最近就出咗事,要敷暖水袋,呢樣自己會好小心,因為年紀唔係細。」

對於演唱會嘅環節,阿康已預告為其音樂旅程,由〈失眠〉唱到新曲〈All That Jazz〉,足以令樂迷萬分期待。

 

早前阿康同太太特別去咗主題公園,為囝囝Jazz慶祝兩歲生日。

 

講到Jazz有冇遺傳到自己嘅音樂細胞,阿康話:「有冇我唔敢講,不過佢捉拍子捉得好準,

 

香烤走地雞配烤意大利青瓜、甘筍苗、黃金甜菜頭及迷迭香肉汁($398),廚師特意採用法國有機走地雞,由於雞隻在農場自由放牧,運動量充足,因此雞味濃郁,肉質結實有彈力。

 

浸煮挪威鱈魚柳配香煎海蘆筍、椰菜苗、鵪鶉蛋及刁草汁($368),每年1月到4月,為北極鱈魚「當造期」。以浸煮烹調,最能品嘗魚肉原味,再配上香煎海蘆筍、椰菜苗、鵪鶉蛋及刁草汁,味道層次豐富。

 

健康減重

為咗今次開show,阿康從年初八開始,已努力健身,仲成功減咗十七磅,「減磅係為咗有體力去應付個show,我又唔會剝衫晒乜肌物肌嘅,你話着啲靚衫個機會仲大啲。

「今次減磅主要都係做運動,食方面我不嬲都奉行多菜少肉,所以都唔辛苦。以前減磅會戒食澱粉質,但係後來我覺得冇咁嘅必要,食少啲就OK。」

好!有好嘅狀態,自然有精采表現,我先預祝阿康Good show!

菜式極具特色,我同阿康梗係要跟餐廳嘅芬蘭籍行政總廚Jaakko Sorsa合照留念。

 

除咗籌備演唱會,阿康最近同Liza姐合作主持節目《娛樂大家》,觀賞價值都相當高。

 

DAIM芭菲($108),靈感源自瑞典傳統朱古力小吃,以蛋白脆餅、配上杏仁、焦糖及朱古力,香脆可口,層次豐富。

 

沙棘莓及黑朱古力脆餅配青蘋果雪葩($108),以北歐獨有嘅沙棘莓製成醬,襯托甘醇嘅黑朱古力蛋糕,配上清新嘅青蘋果雪葩,清新宜人。

 

慢烤黃麂柳配薏米意大利飯,白甘筍,醃南瓜及黑加侖子汁($398),北歐野味菜式當中,黃麂可算是最具特色之一,經慢烤後配上薏米意大利飯,以及酸甜嘅黑加侖子汁,令人回味無窮。

 

FINDS
地址:香港九龍尖沙咀金巴利道39號帝樂文娜公館1樓
電話:25229318