王梓軒畀劉松仁操瘦

由劉松仁（松哥）導演兼策劃嘅音樂劇《利瑪竇》，用足兩年幾時間籌備及三個月排練，將於下月底正式公演。今次係由王梓軒同新加坡「歌后」陳潔儀（阿Kit）擔任男女主角，佢哋連日都忙於綵排，既要講對白，又要唱歌及要跳舞，每周排足六日，每日八粒鐘，絕不欺場。

日前，佢哋就同東姑分享做呢個劇嘅點滴。飾演利瑪竇嘅王梓軒，透露跟松哥結緣於拍攝無綫劇《華麗轉身》，二人更有個「三年之約」。當松哥邀約佢演出時，佢坦言︰「感到好榮幸！最初，松哥叫畀四個月時間佢，我都有啲掙扎，但聽完個故仔，我覺得好值得。由於我要由三十歲演到六十歲，得一場半戲冇我份，我仲要記晒啲歌、舞同對白，體力支出好大。雖然阿Kit成日請我食嘢，我哋試過排完一日後，佢都話我瘦咗。我哋呢個團隊好開心，大家都好融洽。」

至於，阿Kit則是飾演僕人一角，「松哥係透過雯女（鄧萃雯）搵我，初時用手機短訊傳劇本我睇，我一睇就好震撼。個角色係好有挑戰，因為我演嘅係個封建村婦，要由中年演到老，要用好多身體形態去反映年齡，就連唱歌、講嘢嘅語氣都好唔同，呢樣好難！幸好，劇組幫我搵咗心裏面嘅阿婆出嚟，一kick到，咁就會演到。」尚有不足一個月便公演，東姑都好期待。

飾演利瑪竇嘅王梓軒，坦言了解咗主角嘅背景後，對自己嘅人生大有啟發，並獲益良多。

王梓軒要唱十幾首歌，又要記幾版字嘅對白，佢笑言︰「唔係人講o架！」但幸好佢愈演愈熟。

松哥即日來回香港飛新加坡，專誠搵阿Kit參演；而阿Kit就話睇完劇本，內心已答允演出。

雖然台前幕後都係首度接觸，而舞台劇嘅酬勞又唔高，但阿Kit指劇本好好，大家又好團結，所以佢覺好值得。

劉松仁為讓一眾演員可以多角度了解音樂劇《利瑪竇》，特登搵咗來自意大利嘅恩神父，同佢哋分享利瑪竇嘅事迹。此外，松哥亦都係因為恩神父嘅邀約，而創作咗呢齣音樂劇。

雖然松哥係導演，但毫無架子，當眾教演員做戲，連下跪嘅動作都親身演繹。