為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2019 年 03 月 31 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

突破P

好戲同好波一樣,不妨一睇再睇,如林德祿導演嘅「反貪風暴系列」電影,受歡迎到開拍第四集《P風暴》。除咗有古天樂、張智霖同鄭嘉穎主演,仲有林家棟繼首集《Z風暴》後強勢回歸,加埋首度加盟嘅林峯和周秀娜(Chrissie),令追看度再上一層樓。

今次「Paco巨星飯堂」,我就邀請到各有突破嘅「生力軍」阿峯同Chrissie,聯同「反貪團隊」成員夏嫣,去到「田舍家」品嘗高端日本料理,暢談電影背後嘅故事。

喺即將上映嘅電影《P風暴》中,夏嫣、阿峯同Chrissie將各有發揮,令人期待。

 

我帶三位嘉賓,去到位於ICC嘅「田舍家」,品嘗高端日本料理,暢談電影背後嘅故事。

 

阿峯一圓「奸角夢」,佢亦全力以赴,闡釋角色。

 

挑戰奸角


先講阿峯嘅突破,今次喺戲中演反派,佢視之為一大挑戰,「因為我心入面嗰團火儲咗好耐,我一直想演一啲比較唔正常嘅角色,今次呢個無惡不作嘅富二代,算係圓咗我嘅夢。我花咗更多時間,去消化角色,因為力度要掌握得好好,我希望觀眾會睇得舒服。」

阿峯嘅對手高手如雲,影帝級嘅就有古天樂同林家棟,佢盛讚對手之餘,亦不忘歸功認真嘅製作。「雖然我哋冇去真監獄拍攝,但係啲佈景、道具,全部都有懲教署嘅職員指導,連一支牙刷嘅牌子,都係跟足真實嘅監獄。所以我一入到個廠,已經覺得自己真係踎緊監,入晒戲。」

佢又講到拍住古仔做對手戲,係繼十八年前電視劇《尋秦記》後嘅首次,阿峯話感到有壓力o架,「我覺得佢嘅氣場再勁咗,尤其係監獄有一場戲,講我同佢對立,我要將自己嘅氣場再提高,去抗衡佢嗰股氣。

「本來我諗住演富二代好得閒,有咩咪叫啲打手去打咪得囉,點知呢個角色好勇,乜嘢都係第一個衝出去先,所以都要應付吓一啲動作場面。」

習拳擊多時,Chrissie喺新戲有用武之地,連阿峯都話:「佢身手好敏捷,我都捉佢唔住呀!」

 

同樣可以一展身手嘅夏嫣,為角色都有苦練廣東話。

 

林導(中)嘅「風暴系列」深受歡迎,嚟到第四集人才更加鼎盛,重量級生力軍以外,原班人馬鄭嘉穎、古仔、Chilam同家棟,悉數上陣,卡士強勁。

 

動作天份

一講到動作場面,喺戲中演護士嘅Chrissie,好似同打鬥冇關,而同阿峯份屬「仇家」嘅佢話:「我個角色睇落好柔弱,但因為要避開阿峯嘅追捕,所以故事交代咗,我要去學打boxing保護自己,其實我喺戲裏面都幾硬淨。

「而現實中嘅我,都好鍾意做運動,幾年前已經開始學打boxing,我冇諗過今次可以大派用場,而且戲中都有唔少動作戲,通常都係我俾人打多,又成日俾人追,仲走勻海陸空三個地方,陸地要跑大球場,喺直升機又有場打戲,仲要落海。今次拍攝嘅節奏,比以前再緊湊啲,打我都OK,最難反而係逃跑緊嘅時候,都仲要交戲。」

至於由《Z風暴》開始,一直都係演ICAC調查員嘅夏嫣就表示:「今次我係古仔下屬,佢去坐監時,我負責喺外面幫佢查案,又會保護娜姐。」

阿峯同Chrissie立即大讚佢打得,後者話:「我記得第一場戲講夏嫣嚟救我,我一落車就俾啲好高大嘅人捉住,佢喺好短時間已經打低晒啲對手,身手好敏捷。雖然佢手長腳長,但係打得好靚。」

夏嫣接住話:「因為之前拍動作片,學過跆拳道,我自己又好鍾意中國功夫同太極,所以都有學。」

阿峯(右三)話,一着住戲服同進入拍攝現場,因環境因素而極速入戲,令佢演得更得心應手。

 

 

 

Chrissie同夏嫣有對手戲,二人都要發揮動作天份。

 

特別魚子

戲內冇偈傾,但o依家講食經,阿峯同Chrissie都有特別分享。阿峯藉喺上海開設酒吧「Up」,發揚佢對魚子醬同Vodka嘅品味,「Vodka同Caviar不嬲都係絕配,而唔同類型嘅caviar,可以配唔同嘅酒,感覺都係一流,所以我酒吧都有好多唔同嘅Vodka,配唔同嘅Caviar,會有唔同嘅享受。

「通常食Caviar都係食鱘魚子,而我有個同事係俄羅斯人,佢爸爸自家醃製咗啲三文魚子醬,因為三文魚子大粒啲,口感又會豐富啲,入口仲有『卜』一聲。」

Chrissie即刻話:「雖然我冇食三文魚子醬,但我之前去二世古,都有食魚子醬配Vodka,食法係將魚子醬,放喺手背虎口對落個位,然後啜入口。(阿峯:「係呀,因為嗰個位係人體較低溫位置,所以保留到魚子醬嘅精華。」)係咩?我未試過咁樣食,所以覺得好得意。」

極上刺身9款($1730),有牡丹蝦、拖羅、針魚、鰤魚、真鯛、金目鯛、深海池魚、海膽及象拔蚌,樣樣鮮味。

 

特上壽司拼盤12件,包括拖羅、真鯛、鰤魚、深海池魚、牡丹蝦、剝皮魚、赤鯥、金目鯛、黑鯥、右口魚邊、海膽及大蜆。

 

懷石時令前菜5點($500),包括海藻蒟蒻白和醬、螢光魷魚配醋味噌及日本甜番茄、玉子豆腐、櫻花蝦餅及厚燒玉子(前至後),選材時令又開胃。

 

海膽松露焗飯 ($1,200),配上三文魚籽,令味道同口感層次提升。

 

赤甘鯛伴法式魚湯汁($380),湯汁更能帶出魚肉鮮味。

 

鐵板燒宮崎和牛($600/70克),味美得令人難忘。

 

鐵板燒廣島蠔 ($200),經鐵板燒後嘅蠔,外脆內鮮。

 

田舍家 地址:尖沙咀柯士甸道西1號環球貿易廣場101樓A舖 電話:29722666