為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2019 年 03 月 29 日

第四維度 Robynn & Kendy

組合Robynn & Kendy即將推出的新碟名叫《Curations》,意思是為展覽館篩選展品,亦可解治癒。「呢個名係我哋諗嘅。」Robynn葉晴晴如是說。「因為我哋覺得呢隻碟嘅每首歌,都好似展品之外,亦都因為啲歌嘅歌詞,可以治療到自己嘅心靈。」

碟內的「展品」:〈未來紀念館〉、〈世界對我們〉、〈青春終老〉、〈無敵〉、〈負攝石〉、〈荷光〉和〈明陣〉等,都是由一七年開始逐首推出的歌曲,單看歌名,感覺深奧,至少看得出不再是從前〈小說伴咖啡〉那種悠閒、陽光滿滿的類型。

「我哋初初睇到啲歌名,都唔明點解o架,哈哈哈!」她們異口同聲說。「不過呢啲歌,都係我哋呢幾年嚟,經歷過嘅高低起伏,儲番嚟嘅唔同感受。」Robynn說罷,Kendy孫曉慧在旁補充:「o依家呢啲歌,每隻都有自己深遠嘅意思,我覺得好meaning。好似〈荷光〉開頭兩句歌詞,講何謂人生,呢樣嘢,都係我成日會問自己嘅問題。」

畢竟這兩位女子,自一二年正式入行以來,曾因為一四年參加內地的《中國好聲音》,晉身八強,聽見過最多的掌聲;又試過在一六年,不明不白地放了一年悠長假期,感受當然五味雜陳。

而演變成今天的她們,除了多得際遇的安排,亦要多得這七年來時間的洗禮。

 

 

好騰雞

自小熱愛音樂的Robynn葉晴晴和Kendy孫曉慧,前者畢業於美國西北大學,後者則是英國倫敦政治經濟學院的畢業生。兩人回港後,一○年在朋友的拉攏下認識了對方。

Robynn仍然很記得,跟Kendy首次見面前的一件小趣事。「我哋嗰個中間人,之前只係話會介紹個女仔我識,一齊jam歌,冇講乜嘢名。跟住有日,Kendy喺社交網message我:『嚟緊會meet你,好期待呀!』但我嗰陣冇將呢兩件事link埋到一齊,所以我一頭霧水,哈哈!」而Kendy對Robynn最深刻的首個印象,卻是在studio。「佢當時彈緊keyboard,我就jam落去。都唔記得唱乜,但佢係好快就已經捉到個音,和到落去。」

音樂上兩人一拍即合,一一年七月十三日,她們更首次拍片翻唱劉德華〈你是我的女人〉,上載到YouTube,估不到很快便得到數十萬點擊率,獲網民熱捧,順理成章唱到現實中的台上去。

「第一次上台,喺朗豪坊。嗰日好多好多人嚟睇,我哋都好surprise!」Robynn說。「可能嗰陣少YouTuber,所以好多人都慕名而嚟。跟住我哋再喺一間live house cafe唱,三層cafe,有兩層只可以睇直播,但當時好多人睇直播都要嚟……嗰陣我哋好騰雞!」Kendy則說:「嗰種騰雞,可能因為當時冇諗咁多,只係覺得有得唱、有得彈結他?去囉!幾好玩喎!」

 

 

一一年七月十三日,Robynn & Kendy首次在YouTube發放唱歌片,一曲劉德華〈你是我的女人〉,很快便獲數十萬點擊率,成網民熱話。