為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2019 年 03 月 28 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

與工業家談5G商機

二十世紀初期,一班上海和廣東工業家帶住資金和技術嚟香港重新建立事業,推動香港經濟開始發展,到七十年代香港製造業達到全盛時期。不過一九七九年內地改革開放,情況逆轉,輪到香港工業家北上設廠,利用內地嘅土地和人力資源拓展生產能力。今年改革開放四十周年,政府亦肯定香港工業家期間嘅貢獻。

我認識不少香港工業家,建滔集團(0148)主席張國榮(Paul)係我好佩服嘅一位。佢喺改革開放後,八七年就去深圳蓮塘興建集團第一間紙覆銅面板廠,講到當時嘅困難,佢話冇水冇電,真係好艱辛,不過都一一克服,用一年時間喺八八年開廠,之後三十年間喺內地不同地點開咗成六十間化工、玻璃絲、玻璃布、覆銅面板、印刷線路板、石墨烯地暖產品廠。

見到建滔業績報告上講述5G的相關訂單情況,當然要同Paul攞一手料,到底5G科技對工業有乜影響。張兄講笑話最初對於「5G」完全「唔知」,但與同事一齊開發相關產品,至掌握到當中商機。不過佢好坦白,雖然建滔現時接好多5G基站嘅覆銅面板和線路板訂單,但今年有關科技仍在更新換代階段,所以一九年展望平穩發展,真正爆發期喺二○年。

5G係咪需要新電子零件配合?建滔使唔使更新產品和生產設施?Paul話齋,如果有人見到5G有商機至去建立覆銅面板生產設施,唔係唔得,不過可能要捱廿幾年至能夠掌握到建滔嘅技術同成本效益。公司已經建立垂直生產線,大部分原材料自給自足,而且因應5G需要高頻和大型薄板,已經提前投資設立高精度、自動化設備,亦進一步提升玻璃絲和玻璃布嘅質量,生產鏈層層配合,至趕及接到5G基站生意。事實上,建滔嘅玻璃絲布技術屬於行業尖端,連國家相關研究室都設在建滔清遠基地,領導地位可見一斑。

5G除咗應用喺通訊上,仲催生萬物互聯,帶動各行業嘅需求。對於覆銅面板和線路板嚟講,估計一九年全年全球採購額達六百一十七億美元,其中一成九用喺手機、一成二通訊基建,一成一汽車、三成電腦相關用途。5G帶動下,一八至二二年覆銅面板和線路板採購量複合年均增長百分之三點七。目前建滔有涉獵嘅包括基站主板、天線、路由器、醫療、手機、汽車、物聯網用途。

其中華為係建滔客戶,佢又點睇中美貿易和科技紛爭?Paul覺得今年會係中國困難嘅一年,亦係關鍵時刻,但對於有工廠外移,佢就認為唔好過早判斷。好似佢做玻璃絲布,全年無休,年初一都開工,因為玻璃窯爐一開始運作就一日都唔停得,試過市場供過於求因而積存玻璃布,同事向佢請示,佢拍板照做,結果一個升浪全部賣晒。當然,唔係間間公司有實力穩守,呢點係佢至做得到。員工咁努力,所以Paul每年初一都上清遠廠同員工食晚飯,佢都係一位年中無休嘅主席。

建滔集團主席張國榮(左)。