盛品儒孝順媽咪
前亞視高層盛品儒（James），去年十月同老婆蔡一鳳（Michelle）生咗一對龍鳳胎。而身為大清著名政治家盛宣懷後人嘅佢，幫家族傳宗接代、開枝散葉，絕對係個孝子賢孫。
早前下午三點幾，東姑就喺北角巧遇佢，發現佢名副其實係一個超級孝順仔。雖然，佢邊行邊撳住電話，似係忙緊生意嘅嘢；但當日陪住媽咪嘅佢，相信係啱啱母子一齊食完午飯。其後，司機駕駛嘅七人車到達，James對媽媽就照顧得無微不至，先扶老人家坐上車，再安頓埋外傭坐後座照顧媽咪，最後自己先坐上前座。呢啲細微嘅表現，可見佢「暖男」嘅一面，唔單止對老婆，對媽咪都一樣咁窩心o架！
眾所周知係大忙人嘅James，邊行邊掛住撳電話覆短訊，一時冷落咗行喺後面嘅盛媽媽。
當七人車抵達之後，孝順仔James即刻照顧媽咪，攙扶老人家上車，好細心體貼。
James安排媽媽同外傭坐上車嘅後座，而佢就坐車頭，跟媽媽同車離開。
