白姐姐同謝偉俊補擺喜酒?

現年七十四歲嘅白姐姐白韻琴（原名：白韻琹），同細十四年嘅老公謝俊偉（Paul），唔講唔知，原來已經牽手共度咗二十九個年頭。雖然感情上，兩人冇乜大件事發生過，但係白姐姐就經常埋怨阿Paul冇「搞」佢囉。之不過，佢最近就公開向阿Paul「耍冧」認錯：「我都應該向你道歉嘅，令你有咁多難過嘅日子！」呢句說話，唔知有冇弦外之音呢？

其實，白姐姐同阿Paul結咗婚咁耐，出席公開場合時，總係有影皆雙，一直都畀外界感覺兩人夫妻恩愛。而當年，喺拉斯維加斯註冊結婚嘅佢哋，就冇喺香港擺喜酒，似乎爭咗啲啫。日前，東姑去咗一個名為「盡訴心中情基金慈善晚宴」嘅活動，就見到白姐姐同阿Paul超級熱情咁招呼一班舊雨新知；嗰刻，東姑突然覺得好似去咗佢哋嘅婚宴啫。

現場所見，全部嘉賓一到場，都走埋去同佢哋恭賀一番。而去到晚宴嘅中段時份，白姐姐同阿Paul仲攞起酒杯四圍同人碰杯，似足一對新人向賓客敬酒。不過，最抵死就係，「追星律師」曾權威（八十四歲）同黃夏蕙（八十五歲）仲搶鏡，忽然攬到實一實傾偈。當白姐姐走埋去敬酒時，呢對近一百七十歲嘅「老友記」竟然一於懶理，繼續煙韌，主人家睇到都覺得冤氣！

日前，白姐姐同Paul創立嘅「盡訴心中情基金」舉辦慈善晚宴；仲邀請咗唔少娛圈嘅舊雨新知出席。

白姐姐同Paul行埋去敬酒時，「追星律師」曾權威與黃夏蕙傾到雞啄唔斷，竟然當佢哋透明。

曾權威話識咗黃夏蕙五十幾年，勁過白姐姐同阿Paul喎，難怪呢對近一百七十歲嘅「老友記」，唔介意攬到實一實。

久休復出嘅麥翠嫻，當日因為見到好多舊朋友，所以心情非常開心；佢仲即席獻唱咗幾首梅艷芳嘅經典金曲，幫慈善基金籌咗近十萬蚊。