為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2019 年 03 月 21 日

CY轟林子健判刑太輕 幫拖黨友應齊齊重罰

民主黨成員林子健虛報被國安擄走兼用釘書機喺大腿釘十字嘅鬧劇,終於上星期喺法庭有個結論:林要為佢嘅荒誕大話坐監五個月。但係林子健仍堅稱自己係「被屈」,立即申請上訴。

全國政協副主席梁振英(CY)睇唔過眼林子健同佢班黨友喺呢單鬧劇上嘅所作所為,連日喺社交網發文狂轟,以「誣告反坐」為題,批評林子健以誣告方式針對性地陷害中國及特區政府,罪行嚴重,應予重罰,直指「入獄五個月的判刑太輕了,和誣告成功的惡劣影響不成比例,也根本沒有阻嚇作用。」

當日林子健自編自導自演一場政治鬧劇後,傍住佢唔去報警唔去睇醫生,而係出嚟開記招「爆大鑊」嘅幾位民主黨高層,早已冇晒影,明顯係知衰立即同林割席。但佢哋一直無為自己疑似「協助誣告」一事道歉而惹人詬病。CY喺文中一針見血指出,誣告係嚴重罪行,直言「法律要嚴懲誣告者,以儆效尤」。

CY話佢咁講係有根有據,睇番中國古代刑法有一項原則,就係「誣告反坐」,意思係如果誣告他人犯某種罪,誣告者就要倒過來接受呢種罪嘅刑罰。

佢仲強調,林子健和林卓廷等泛民當日喺記者上指控「禁錮、毆打和恐嚇」嘅不是張三李四,而係中國政府,甚至指控特區政府係幫兇,受害的是全國和全香港嘅國內外聲譽,「即使只有百分之二十的人相信林子健和林卓廷,在香港,信的人是以百萬計;在國外,是億計,中國的國際聲譽會受影響,人權紀錄會蒙污,香港的投資評級會下跌。」

CY分析話,如果當日無咗閉路電視紀錄,中國政府同香港政府喺呢件案上真係百辭莫辯,水洗都唔清,如今僅將林判刑五個月,根本反映唔到罪行嘅嚴重性。佢又批評今次干犯誣告罪嘅似乎唔止林子健一人,有關案件不應到此為止,直言「在浩瀚無垠的普通法中,要找出檢舉共犯從犯的法律依據相信並不太難。」

林子健(左二)當日與一眾泛民高層開記招,言之鑿鑿聲稱遭強力部門迫害,背後原來大話連篇。

 

獲准保釋申請上訴嘅林子健仍對記者堅稱自己係「被屈」。

 

梁振英喺社交媒體發文批評林子健案以誣告方式陷害中央及特區政府,罪行嚴重,入獄五個月的判刑太輕。