做每件事，都要全情投入，先對得起自己。最近「耀榮」同門嘅「雙嘉」：傅珮嘉（Maggie）同張紋嘉（Crystal），先後推出單曲新作，佢哋同樣花盡心思，全力以赴。

今次「Paco巨星飯堂」，我就請嚟「雙嘉」，去到位於銅鑼灣嘅「鐵板燒雪舟」，品嘗聞名世界嘅飛驒牛，細說佢哋喺音樂路同人生路上嘅新動向。

Crystal同Maggie都有一把好聲音，二人現為同門，除咗各自已推出嘅新作，日後定必有更多嘅合作機會。

各有新作

Maggie啱啱推出新歌〈靜音模式〉，今次佢仲親自填詞，寫當一段關係去到要啟動「靜音模式」嘅時候，到底該如何抉擇。「o依家人人都有手機，機不離手之餘，資訊仲好發達，惟有開靜音模式先會有一時清靜，我將呢種矛盾同掙扎，代入歌裏面，比喻情侶關係嘅拖拉同無奈。」

將生活寫入作品，並不代表Maggie嘅真實生活，雖然佢已為幸福媽咪，但講到一九年嘅大計，除兼顧家庭，佢透露今年將會舉辦自己嘅音樂會，仲已經選好了二十首左右嘅歌曲，與樂迷分享。「我希望能夠令現場樂迷感受到大家與歌曲嘅連結，尋找當中嘅共鳴。」

另一邊廂，Crystal加盟新公司後，推出咗第一首新歌〈獨立單位〉。新作嘅MV由作曲人李拾壹，同新晉導演Gary一齊構思同拍攝，當中有幕生日派對場面，需要搵唔少朋友拍攝，人緣好嘅Crystal一開口話需要幫手，佢嘅真實好友即刻悉數撐場。

「拍攝嗰日，係Maggie舉行迷你音樂會嘅同一日，佢完成工作之後，仲特登抽時間嚟探班，仲陪我一齊拍，拍完又同我食消夜傾偈。」

除為自己嘅歌曲拍攝MV（上圖），Maggie亦有去Crystal新歌MV嘅拍攝現場探班，力撐師妹。

我帶「雙嘉」去到位於銅鑼灣嘅「鐵板燒雪舟」，品嘗特色鐵板燒，細說佢哋嘅新動向。

 

今次我同兩位嘉賓品嘗嘅，分別係商務午膳（$628/位）、雪舟鐵板燒午餐及日本鐵板燒午餐（價格隨組合變化而有不同，詳情請向餐廳查詢）。當中包括時令刺身及前菜。

 

帶子及大蝦，鮮味無窮。

追夢媽媽

Maggie一直冇放棄唱歌，只係將陣營轉移至台灣。一四年留台發展時，改名為傅又宣，佢去年簽約新公司，就全面回歸香港。o依家囝囝已經八歲，佢既要湊仔，又幫老公手打理麵店，同時為歌唱事業努力，身兼「三份工」，但佢話o依家嘅狀態同心態，都處於最佳狀態。

「老公會幫手湊小朋友，有時我喺最辛苦同最攰嘅時候，聽番自己嘅歌，就唔捨得唔繼續唱！要得到香港人嘅歡心唔容易，但可以做嘅我都盡力做，做得好就當係Bonus，o依家我冇太大嘅得失心。

「以前我比較負面同悲觀，唱嘅都係慘歌多，個人多愁善感又唔鍾意笑，所以好多人成日以為我黑面。老公同囝囝改變咗我好多，人生可以好開心、簡單。而且我覺得身教緊要，小朋友會學習父母，所以自己要做個好榜樣。」

Maggie同老公經營台食餐廳「三星台菜食堂（Tristar Kitchen）」，但佢自稱「無飯主婦」，「我老公係高手，相比之下我差太多。佢連切肉嘅紋理都研究埋，我就只係知道好食同唔好食o架咋。」

雖然身兼三職，但Maggie仍神采飛揚。

Maggie不時喺IG上載同囝囝Jasper嘅生活點滴，溫情洋溢。

早前Maggie一家去日本度過白色假期，不忘放閃。

法國產鴨肝，配上蘋果，入口毫無膩感。

南非產鮑魚，夠晒鮮甜。

重新出發

而Crystal就講到新歌〈獨立單位〉，「呢首歌係一個獨居嘅故事，入面90%都係我嘅故事。歌詞講到一個人喺茶几食飯、啲衫可以周圍放，其實嗰個真係我。」

Crystal九年前開始獨居，佢形容當年係一時衝動：「嗰陣因為工作時間長，唔方便同屋企人住，期間我都有試過同居生活，但最後係分手收場。嗰刻好唔開心，於是就『我要改變生活！我要自強！』完全冇諗過水電煤、日常開支嗰啲問題，其實係好大鑊。」

除咗有新嘅音樂作品，Crystal都有參與其他演出，佢早前在黃秋生、惠英紅主演嘅《心冤》中，亦有所發揮。

喺Crystal拍攝新歌MV期間，佢唔少真朋友都現身，為生日派對一幕客串。

飛驒牛西冷，入口即溶。

九州地雞，嫩滑多汁。

日本黑豚扒，肉質鮮美。

鐵板燒雪舟
地址：銅鑼灣開平道1號Cubus 8樓
電話：25760880