為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2019 年 03 月 21 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

四月花見

之前「出」咗幾個團,同團友一齊搵食歎靚酒店,淺談投資,深啖美食,大家熟絡咗,好似成班朋友約埋去旅行咁開心。呢幾個月事忙冇出團,團友紛紛慫恿我出山,我見三月業績期後有幾日空檔,於是再搵旅行社搞番個日本賞花美食遊。行程設計好之後,有團友講笑話呢團「花多眼亂」兼「日全食」。

香港人去日本有返鄉下之稱,我自己都好鍾意遊日,除咗美食吸引亦喜愛當地內斂恬靜嘅景物,今次可以睇埋櫻花更加期待。仲記得第一次去日本係一九七七年度蜜月,嗰陣參加一個最傳統嘅旅行團,去咗東京、日光市、鬼怒川、富士山,當時二十六歲仔首次遊日當然覺得好新鮮,仲喺鬼怒川初次浸溫泉。

之後再去日本玩多數同朋友家人,一齊搵啲特色地方同美食,悠閒歎下溫泉。但由於係自由行,言語不通,所以都試過鬧出笑話。記得三、四年前同太座、阿女和女婿四人行出發往大阪,阿女精心挑選咗一間米芝蓮餐廳試佢嘅廚師發辦。入座後就開始逐款食物上,我哋當然食得好開心,但食物一路上冇停過,大家都開始食唔落,終於雞同鴨講之後至叫停。我哋仲奇怪呢位大廚預食物預得咁多,後來埋單一睇四人共接近兩萬港紙,再同侍應溝通加埋手語,至明白原來大廚係會一路出菜,如果客人覺得已經夠就示意停止。我哋亦估唔到金額咁大都唔收信用卡,結果四個人要夾晒身上嘅現金至夠數,爭啲要出去搵銀行撳錢。

嚟緊四月行程包括名古屋、飛驒高山市、白川鄉、岐阜等,費用全包,團友唔使驚帶唔夠現金,除非美食當前想有料添加!講到日本美食,當然唔少得和牛,今次會品嚐到兩個著名產地嘅牛肉,包括三大和牛中嘅松阪牛。來自三重縣嘅松阪牛被評為最頂尖和牛,亦係全世界最貴嘅牛肉。貴喺邊?除咗因為細緻嘅霜降、柔軟肉質、濃郁牛香,每隻牛都會用嚴格嘅識別管理系統監控。聽聞仲會以啤酒飼養,增加牛嘅食慾及牛脂。而且松阪牛產量稀少,每年只有約二百隻,物以罕為貴。

另外會品嚐嘅飛驒牛來自岐阜縣,曾經連獲三屆最優秀食用牛肉獎。飛驒牛牧場都喺海拔三千幾米嘅高山上,低溫環境之下飼養,特別之處在於油脂分布均勻,入口即溶。除咗和牛,我哋住溫泉酒店當然會品嚐會席料理,亦有傳統壽司和精緻蟹宴。另外,成日聽人講去名古屋一定要食鰻魚飯,當地鰻魚養殖係日本之冠,既然去得名古屋當然唔會錯過啦。

為全方位賞櫻,我哋會去新境川堤、中橋、飛驒川公園和惠那峽等著名景點尋找花蹤,仲會去白川鄉參觀傳統建築合掌造,同埋去睇江戶時代嘅高山陣屋。日間行程豐富,夜晚可以返溫泉酒店歎私人風呂。好多團友同我講,跟我嘅團除咗食好住好,仲可以大家傾下投資之道,同其他團唔同體驗,所以賣下廣告,有興趣可以上尊賞假期網站搵陸叔日本『花見.美饌』之旅嘅資料。

陸叔喜愛日本,四月會搞個賞櫻美食遊。