為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2019 年 03 月 17 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

本土威力

拍電影要用心,尤其係o依家本地製作彌足珍貴之下,香港嘅電影人就要更花心思,先可以拍出感動到觀眾嘅佳作。新片《入鐵籠》表面上係打到火花四濺嘅動作片,實際上就係藉MMA,帶出貼近現實嘅兄弟情,實在值得推介。

今次「Paco巨星飯堂」,我就邀請電影嘅監製梁鴻華,率領導演翊恆(Daniel)、主角馬志威(Edward)、林耀聲同楊柳青,去到位於尖沙咀嘅「TeaWood Deluxe」,細說渾身肌肉又打到拳拳到肉嘅背後,隱藏嘅故事。

阿聲、小青同Edward(左至右)為新片《入鐵籠》施展渾身解數,值得支持。

 

星級參考

兩位男主角Edward同阿聲首次合作,喺戲中飾演兄弟,佢哋喺拍攝前更進行了一連串MMA訓練,操得一身結實肌肉。

既然要演出拳手,Edward就表示,事前都睇過好多MMA比賽作參考,導演亦有俾格鬥家Conor McGregor嘅短片佢睇。「我記得有一場決鬥,導演要求我囂張啲,叫我參考一下Conor McGregor,拍出個個都話好『招積』(其角色名);但我喺電影入面,唔只參考咗Conor McGregor比賽嘅一面,其實我更想話俾觀眾知,我個角色喺擂台可能係好『招積』,但係拳手真係做咗好多賽前準備功夫,無論係增磅定減磅,同埋賽前過磅脫水,都係好考意志去完成。」

電影圍繞住綜合格鬥(MMA),打鬥場面自然係重點,Edward表示自己好幸運冇受傷,佢反而對拍攝過磅一幕最印象深刻。「我都知道拍攝動作戲會好容易受傷,我好好彩無咩大傷,但就好記得有一場戲要拍攝過磅,我真係要脫水,令到自己係好乾身,當時嘅小便都去到啡色,好誇張!拍呢部戲係我一生中最辛苦的經歷,但好值得記念。」

第一次拍動作戲嘅阿聲就話:「我好彩,唔似Edward咁要食得清淡,我反而需要食好多嘢,去增磅增肌肉,其實電影拍出嚟嘅畫面,就係我同Edward嘅真實情況;佢好辛苦咁去減磅、脫水、無啖好食,我就係咁食嘢去增磅,一日食六餐,食雞髀都無問題。」

我帶五位嘉賓,去到去到位於尖沙咀嘅「TeaWood Deluxe」,品嘗餐廳同「萬希泉」聯乘出品嘅高級台式fusion菜,細說《入鐵籠》背後嘅點滴。

 

戲中格鬥場面多,男士應該睇得投入。

 

人蔘烏龍珍珠奶茶(熱$52/冰$56),熱飲以茶壺奉上,別緻優雅。

 

氮氣人蔘烏龍茶(杯$54/樽$78),茶中加入氮氣,比普通茶更清新醇厚。

 

威士忌乾炒三杯雞($108)以威士忌取代一般三杯雞使用嘅紹興酒,令味道更加濃郁。

 

痛下苦功

Edward嘅苦功,喺開戲前一個月就開始。「我每星期要操六日,每次六個鐘;會先做重量訓練,做十幾組,sit up同掌上壓一日keep住都做二百幾下,之後先再練綜合格鬥動作;每日飲食又要非常清淡,真係無啖好食。」

佢仲搞笑咁話:「每日去到現場嘅飯盒,都係烚雞肉及烚菜,同阿聲嘅主要話題,都係圍繞當日嘅雞同菜烚成點;嗰段時期都好辛苦,所以我都有試過頂唔順,偷食少少朱古力。」

阿聲就話,每一日都令佢非常深刻:「諗番都好感嘆,拍攝嗰陣試過連續打十日,仲要每場戲都打;最誇張係有一次要拍攝擂台大戰,我同對手要喺鐵籠困獸鬥四十八小時,拍嗰日仲要打風,我哋由三號風球拍到八號風球,拍完先知原來拍咗咁耐。

「仲有另一場戲,我要喺堤壩一條梯上面做sit up,嗰度有成四層樓高,我得一條好幼嘅線綁住自己,其實都幾驚,嗰陣先知,原來動作片真係搵命搏o架!」

喺戲中飾演兄弟,一樣要打鑊甘,阿聲同Edward喺背後付出好多努力,先有成果。

 

近期憑劇集《荷李活大老千》(右圖)成功入屋,即將又有新戲上映,Edward前途無可限量。

 

 

 

文戲代表仲有元秋同葛民輝,有兩位實力派為電影加持,增加可觀性。

 

酥炸排骨西班牙橡果豬肉燥飯($138),排骨選用英國保濕豬製作,肉質更鬆軟(左圖);肉燥飯上西班牙橡果豬肉,配上以台梗9號米煮成嘅飯,層次更豐富。

 

 

 

終極目標

兩位男主角都傾盡全力,本身係武術高手嘅小青,今次就相對地「清閒」,「我飾演Edward嘅女朋友,談情戲較多,動作場面就少啲。所以冇佢哋咁辛苦。」

而導演Daniel前作有《紮職》同《古惑仔:江湖新秩序》,全因佢一個兒時夢想。「我十歲就移民去咗澳洲,成長時期一直都鍾意睇港產片,主要係關於黑社會同江湖嘅題材。所以之後回港返嚟,我都係拍呢類型嘅題材,今次都唔例外,因為江湖背後,都係有兄弟情嘅表現。今次有強勁嘅打鬥,畫面上好刺激之外,兄弟情係我終極想帶出嘅訊息。」

有心有付出嘅電影,係值得支持嘅,我先預祝電影大賣!

雖然小青習武已久,但今次佢以文戲為主,「嚟緊我參演嘅作品,都係以動作掛帥。」咁就有大把機會,俾佢一展身手。

 

 

 

幕後大腦係身兼編劇嘅導演Daniel(左),同監製梁鴻華(右),佢哋同為本土電影出力。

 

MTW黑糖珍珠舒芙蕾班㦸($88),即點即製,鬆軟香綿又富空氣感。

 

燒加拿大帶骨豬鞍排($208),豬鞍排脂肪比例均勻,內裏juicy。

 

12小時慢煮原條牛肋骨台式手作麵($328),每日限定十碗。經十二小時慢煮嘅美國牛肋骨,嫩滑多汁;湯底充滿牛骨香,配上每日自家製嘅手作麵,令人回味。

 

TeaWood Deluxe
地址:尖沙咀河內道18號K11地庫一層B105-B106舖
電話:26683300