為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2019 年 03 月 17 日

火雞姐地位大「升呢」

現年廿四歲嘅網紅丁可欣(火雞姐),得到名導彭浩翔嘅另眼相看,力捧喺賀歲片《恭喜八婆》擔正。早前,仲畀本刊獨家影到佢哋結伴溫馨睇家品,榮升成為彭導嘅愛將。

身價飈升嘅火雞姐,似乎真係今時唔同往日,好似佢早前出席一個公開活動之後,東姑就發現有唔少粉絲一心嚟等佢,當然唔少得向偶像「集郵」嘞。

而當日所見,火雞姐亦都有新紮姐仔嘅排場,除咗有司機揸一架私家車接載出入之外,仲有個猛男助手傍實,跟出跟入,送佢落樓之餘,跟住又送埋佢返屋企,又上落車都幫佢開埋車門,認真服侍周到。至於,形象不嬲唔係走玉女路綫嘅火雞姐,一上到車就即刻急不及待,拉低車窗吞雲吐霧,真我個性盡表現。睇嚟,佢嘅煙癮都相當大!

唔好睇小火雞姐嘅排場,現場所見,全程有個着住背心嘅猛男助手,貼身服侍佢。

 

人氣飆升嘅火雞姐,出席完公開活動之後,仲有粉絲搵佢「集郵」影合照。

 

火雞姐出入都有司機接載,上車前,猛男助手仲非常殷勤,幫佢拉埋車門。

 

一上到車,火雞姐已急不及待,拉低車窗吞雲吐霧,睇嚟煙癮都相當大吓。

 

之前喺網絡人氣爆紅嘅火雞姐,最近就喺賀歲片《恭喜八婆》擔正,榮升名導演彭浩翔嘅愛將。