主頁 > 專欄 > Paco巨星飯堂 > 金像新勢力 2019 年 03 月 10 日

黃栢高

黃栢高(Paco)，金牌經理人，叱吒樂壇三十年，炮製無數金曲，捧紅不少歌手。近年涉足電影，《行運超人》、《龍咁威》、《殺破狼》等，皆叫好叫座。最新動作，除於本刊主持《Paco巨星飯堂》，每逢周一更在《頭條日報》主持「名人會」專欄，專訪城中名人、紅星。

金像新勢力

我一向大力支持電影製作，所以一睇到今屆香港電影金像獎嘅提名名單，就spot到唔少新面孔，當中即將喺今個月上映嘅《G殺》，就榮獲六項提名，包括最佳新晉導演同最佳新演員，成績亮眼。

今次「Paco巨星飯堂」，我就邀請導演李卓斌，率領演員陳漢娜（Hanna）、林善同陸駿光（Alan），去到位於油麻地嘅「麻神麻辣火鍋」，品嘗特色嘅台式麻辣火鍋，拆解獲得金像獎多項提名嘅秘密。

即將上映嘅電影《G殺》，榮獲本屆香港電影金像獎六項提名，包括最佳新晉導演同最佳新演員，成績亮眼。

為藝術犧牲

導演曾經係我合作過嘅團隊成員，製作過《我的最愛》、《至尊無賴》等經典作品，o依家見到佢終於獨當一面，我都相當安慰。

佢嘅處男長片《G殺》，梗係要由導演親自解說。「個故仔係由一宗人頭命案開始，大家會諗究竟兇手係邊個？亦都會諗死者係邊一個？而套戲叫《G殺》，係因為成部戲以G字，將所有嘅事件串埋一齊，變成啲時間唔需要直線咁行，可以前後跳敍。」

特別嘅敍事風格，令導演得到提名外，演員都特別有風采，雖然林善係新演員，但就因而有機會角逐最佳新演員。

「今次係我第一次演出電影，參與拍攝電影時我仲讀緊書，喺演藝學院讀緊電影電視學系，係因為我喺fb見到《G殺》搵演員，其中有個角色一定要識拉大提琴，而我本身真係識拉大提琴，有機會參與真正電影嘅製作，於是我就去casting，就俾導演揀中咗。」

女主角Hanna就有大量發揮嘅機會，「今次我做一個十六歲嘅中學生，屋企比較複雜，媽咪過咗身，佢同爸爸關係又唔好，我覺得好難演，因為佢嘅經歷比同輩多，有後母、又有師生戀，踩住一啲道德觀念嘅界線。

「但係導演非常好，開拍前安排咗我哋上啲樂器嘅訓練，同埋又一齊排戲，feel到導演、副導同編劇好團結一致，想成個團隊做好件事。」

我帶四位嘉賓，去到位於油麻地嘅「麻神麻辣火鍋」，品嘗特色嘅台式麻辣火鍋，拆解獲得金像獎六項提名嘅秘密。

另一位獲得金像獎提名嘅，係角逐最佳女配角嘅內地演員黃璐。

除咗展開師生戀，Hanna同林善都有少許感情戲份。

麻神麻辣老饕鍋拼花膠雞鍋（$298），一次過品嘗餐廳兩大招牌菜，既麻又滋補。

麻神特選老饕鍋（$118），內裏為牛肚、牛筋及牛肚，為全牛盛宴。

手切特選牛頸脊（$328大/$228小），脂肪同肉分布均勻。

真惺惺相惜

相比林善同Hanna，Alan就較為「熟口面」。「我都做咗好多年戲，電影就係呢幾年先開始，今次我飾演一個老師。我記得我啱啱攞到劇本時，我都唔知點演，因為個角色好複雜，有師生戀，又講我召妓，另外仲有同信仰有關嘅嘢，呢度唔透露太多，感覺上唔係一個好真實嘅人。但個角色好值得我去挑戰，於是我搵咗個藍本，參考咗一啲朋友嘅經歷，再去研究成個角色。」

Alan仲表示，一早已記住導演之名。「我真正識佢係呢次合作，但佢嘅作品，我十年前已經睇過，嗰時我喺一個短片公開比賽中做演員，我唔係做佢嗰條（短片），佢有份參加比賽，我睇佢嗰條片叫《潛入戲院》。睇完我諗，點解佢可以咁勁？佢敍事風格已經係跳嚟跳去，好特別，我就話如果第時有機會合作就好嘞！到佢問我有冇興趣演呢個角色，我第一日已經話好，之後合作都開心。」

導演盛讚戲中演員嘅表現，對廿五歲嘅Hanna「逼迫」自己演活十六歲中學生嘅決心，特別欣賞。

電影以跳躍式嘅敍事手法，逐步帶出故事，因而脫穎而出。

綜合丸子拼盤（$118），包括牛丸、魚丸、豬肉丸、蝦丸及墨魚丸，全為自家製。

晶讚紫米糕（$68），為麻辣湯底不可或缺嘅配料。

精選原味蛋餃（$62/8隻），餡料為豬肉，以蛋皮作餃皮，甚具特色。

即學廣東話

外表甚可愛嘅導演，仲即時為作品補充：「除咗在座三位演員外，全部演員都好恰如其份，演活咗戲入面幾個角色。因為每個角色都好立體，個個都有戲做，唔似得有啲戲某啲角色係冇乜嘢做，我哋套戲嘅角色又有挑戰性。例如Hanna，演戲時個樣好細個，你真係覺得佢似係一個學生，佢都俾咗好多壓力去push自己去到嗰個位，記得開頭有一組鏡頭，其實我ok咗，但佢覺得自己做得唔好，之後又匿埋一邊喊，我覺得佢好努力。

「o依家金像獎我哋有六個提名，包括最佳新晉導演、最佳新演員、最佳女配角、最佳剪接、最佳攝影同最佳音響效果。其實我哋套戲得七個演員，當中有啲熟悉嘅亦有啲新面孔，尤其係黃璐，香港觀眾唔係咁認識，其實佢外號係『內地藝術片女王』。佢好幫手，見一次面已經話要做我哋部戲，套戲係全廣東話對白，但佢本身係四川人，完全唔識廣東話，結果佢即刻學，然後一嚟就拍嘞。真係估唔到香港咁多評審都鍾意佢，而佢能夠入圍最佳女配角，我都好開心。」