出道近八年的張振朗，早年因貌似張智霖而彈出，近年劇接劇外，又在《美女廚房》中擔任三大主持之一，剛在拍畢的無綫新劇《機場特警》中，已「升呢」為男一。

備受力捧的他，於拍得如火如荼的新劇《極道怪咖》中孭重飛。由於要飾演社團高層，他染到一頭白髮，外形霸氣十足。日前，他和同派系的另一高層徐榮為爭上位講數，近三、四十身穿黑色衫褲人士紮行馬，氣氛緊張，開拖一觸即發。

當日拍攝的場面，講述徐榮跟張振朗正面開拖講數，雙方不僅紮行馬，更使出凌厲的眼神互睥。

為令其演繹的社團高層角色更神似，徐榮臨時加插叼起支大雪茄，再加噴煙的動作，明顯招積得多。

互相怒睥

日前，張振朗、賴慰玲、傅嘉莉、林宣妤、徐榮、許家傑、李成昌等，齊集黃大仙的警署門外，為新劇《極道大咖》拍攝外景。當日劇情講述，賴慰玲和傅嘉莉的龍頭老竇過身後，社團高層張振朗和軍師李成昌在接她們離開警署時，同門的另一位高層徐榮手持大雪茄，一臉氣燄地帶着大批o靚前來截擊。兩幫近三、四十人馬正面交峰，而兩位大佬為爭上位，先用凌厲的眼神「互睥」，徐榮繼而除下黑超，跟着突然出手將張振朗推埋車頂。身為差人的許家傑見情勢失控，即時大聲喝止︰「唔好搞事！唔係拉晒你哋返去！」而大批警員也到場壓陣，兩幫社團也識趣地收手。

因為這場戲是大場面，所以由早上十點拍至下午六點，拍足八粒鐘。雖然鏡頭前，一眾演員表現緊張，但鏡頭後，大家卻相處融洽，黑白兩道理應對立的許家傑和傅嘉莉、林宣妤都一樣有偈傾。而張振朗則對幕後工作甚感興趣，一度跟攝影師學揸cam拍攝，似模似樣。

徐榮跟張振朗明爭暗鬥，勢成水火；期間徐榮更激動得將對方推埋車頂，以示警告。