張頴康重遇「老竇」

同麥雅緻結婚六年嘅張頴康，二人育有一對仔女，感情至今仍如膠似漆。剛拍畢無綫劇集《解決師》嘅佢，即三代同堂去泰國輕鬆一下。

呢排尚未開拍新劇嘅張頴康，日前就撇甩老婆仔女，單拖出席一間藥妝連鎖店嘅春茗晚會，同場仲有林偉、李君妍、尹揚明等，而羅均滿仲做埋司儀，幫手搞㷫現場嘅氣氛。現場所見，一眾藝人不知幾受啲職員歡迎，不斷被捉住「集郵」。

當晚，原本喺度影緊相嘅張頴康，一見尹揚明即飛身上前，跟住好有禮貌咁同對方講︰「你好！我以前喺《活着有明天》嗰套戲度，做過你個仔。不過，好多年前啦⋯⋯」兩男握一握手，順利完成一場「父子相認」。東姑翻查資料，嗰套戲喺〇四年上畫，成十五年前，張頴康都仲記得。佢真係唔止「好好先生」，仲好好記性噃。

身為嘉賓嘅張頴康（右），仲上台抽獎；而身旁嘅羅均滿（左）則擔任大會司儀。

東姑以為張頴康同尹揚明風馬牛不相及，原來佢哋早於十五年前喺電影中合作過，張頴康仲一見「老竇」就閃電走上前say hi。

近日拍緊無綫新劇《唐人街》嘅林偉，當晚亦有抽空出席，現場更加畀唔少女職員包圍，深受歡迎。