舊區的潛力

買樓自住要考慮一家人嘅工作、返學和生活需要，如果加埋投資因素，地點自然係關鍵。Location, location, location就係人都知，但地點優越嘅物業樓價亦會貴，可以話已經反映地利優勢，所以買家都會着力發掘有升值潛力嘅地區，喺當中尋寶。

好似港鐵南港島綫在二○○七年經行會批准，一一年動工，一六年底落成，呢段期間可以見到沿線嘅黃竹坑由一個老舊工業區，轉變成酒店、寫字樓、住宅林立嘅商業地帶，樓價當然三級跳。港島西環同樣因為西港島綫帶動，一躍而成為型格餐廳進駐嘅地區，住宅樓價亦節節上升。

投資者和置業人士繼續尋找有發展潛力嘅地區，其中土瓜灣近年備受注目。首先當然着眼於啟德千億（港元，下同）發展計劃所帶來嘅經濟效益。啟德項目規模龐大，總規劃超過三百二十公頃，政府喺○九年拍板，分三階段興建，包括已啟用嘅郵輪碼頭，未來仲會有四萬五座位嘅體育館，以及近一千一百萬平方呎商業樓面面積，可作辦公室、商店、酒店等發展。發展商對啟德發展興趣濃厚，過去投地都多次創下新高。

另外，帶動當區發展最重要嘅交通網絡，目前興建中嘅有連接啟德、觀塘和將軍澳嘅六號幹線、沙中綫，將興建有通往九龍城和新蒲崗嘅地下街，以及單軌列車系統。其中沙中綫對土瓜灣嘅發展最為重要，雖然落成日期將會延後，但未來由土瓜灣站搭兩站就可以去到啟德站，四個站直達金鐘，無論去港島或九龍東商業區，都可以經鐵路直達。再去遠啲，由土瓜灣坐四個站就去到柯士甸站，坐高鐵都好方便。揸車去尖沙咀約十幾分鐘，過海去中環或港島東都係廿幾分鐘，都好方便。

對於投資客，土瓜灣日後嘅租金回報應該唔錯，至於置業家庭除咗返工方便，呢區屬於三十四校網，係傳統名校網，亦有直資名校和國際學校。飲食消閒方面，土瓜灣一向係覓食者愛到嘅地方，將來港鐵通車相信會有更多食肆進駐。社區持續發展，已經見得到區內不斷有新樓落成，社區變得更有活力。樓盤落成亦配套商場，日後娛樂、消閒、購物設施都可以喺區內搵到。

市建局亦正在土瓜灣進行重建計劃，涉及樓宇樓齡超過五十年，發展成本要一百億元。雖然有老街坊會唔捨得舊時景物，但老區重建始終係社會發展必經之路，我希望重建後能夠保留一啲原來特色，另外能夠俾小店繼續經營，服務街坊，最重要係市建局承諾會優化區內交通。重建計劃加上其他新樓盤落成，相信會為土瓜灣帶來新面貌。

其實土瓜灣地產價格已經開始靜靜起革命，最近區內工業物流區就有一項物業以二點五億元易手，睇資料原業主於一九七八年以二百萬購入，持貨四十一年升值一百二十四倍！