為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2019 年 03 月 03 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

東東音功

睇演唱會,除為咗同啱嘅人有互動,有時都可以為咗一份情懷,或者一份回憶。嚟緊陳曉東喺紅館舉行演唱會,明顯就係帶住一份集體回憶會知音。

今次「Paco巨星飯堂」,我就請嚟主角東東,同為佢演唱會擔任形象設計師嘅Koyo William(張國威),去到位於黃埔嘅「老爹火鍋料理」,品嘗高質火鍋,慢慢細說演唱會嘅點滴。

入行廿四年,東東於三月終於踏上紅館舞台,舉行《Planet XT 陳曉東世界巡迴演唱會》,一嘗心願以外,佢喺服裝上都花盡心思,搵嚟曾經同G-Dragon、Celine Dion同周杰倫等國際級Super star合作過嘅Koyo William操刀,務必令粉絲耳目一新。

 

首踏紅館

東東嘅世界巡迴演唱會,經過澳門等站後,終於嚟到佢嘅主場香港。「我離開香港已經有一段長時間,做澳門站之前都推出過廣東歌,今次係我入行以嚟嘅第一個紅館演唱會,我特別要隆重其事。

「今次演唱會名為『Planet XT』,意義好深遠o架,成個concept嚟自科學家發現嘅真正第9大行星『Planet X』,以宇宙嘅毀滅同重生,帶出生命嘅奇妙。『XT』就係曉東兩個字嘅普通話英文拼音,由我用自己嘅經典歌,去歌頌同感恩生命。每部分同每首歌,我都希望可以用心帶出背後嘅故事同訊息。」

首次踏上紅館舞台,東東話全無壓力。「我一向都有教練指導徤身,身形同體力我一啲都唔擔心,一邊唱一邊跳肯定唔係問題。反而揀歌就難好多,畢竟我咁多年嚟嘅作品實在太多,要喺入面揀廿幾首串連成個演唱會,又要貼題就真係考起我。」

我帶兩位嘉賓,去到位於黃埔嘅「老爹火鍋料理」,品嘗高質火鍋,慢慢細說演唱會嘅點滴。

 

從海報已可預計,東東嘅演唱會充滿未來感,佢話一定會施展渾身解數,為入場粉絲帶嚟驚喜。

 

海鮮刺身(時價)每日新鮮運到,包括美國生蠔、南非龍蝦、花竹蝦、南非鮑魚、帶子及蟶子皇等,任君選擇。

 

雙拼湯鍋($178)可自行配搭組合,圖中為秘製特濃豬骨鍋及懷舊沙嗲鍋,各具特色。

 

台式養生鍋($128),滋陰養顏。

 

冧寵嬌妻

o依家東東正積極排舞中,日日由朝練到晚,佢將喺排舞室練習嘅相片,放上社交網站同網友分享,「我每日用個幾鐘做Gym,之後再跳三個鐘舞,咁操法啲舞步實進步,同埋o依家啲肌肉感幾好,睇樣都見到自己大隻咗唔少。哈哈!」

而進行地獄式狂操前,已榮升family man嘅東東,就撇低兩個囡囡,帶咗太太去日本旅行。「我會盡量做好自己同愛錫屋企人,咁啱二月有三個大日子,我都要交人同交credit card,先係十二號結婚五周年,十四號就情人節,跟住十六號就係太太生日。佢(太太)比我更加懂得同人相處,識咗佢之後我就一直正面咁俾佢影響,係佢將我變成一個更加好嘅人。」

東東嘅基地於多年前北移,至婚後佢更定居北京,今次喺香港開演唱會,可算係佢「回流」嘅標誌。

 

身為family man嘅東東,拖妻女shopping被記者發現,為家人護駕同時,不忘向傳媒打招呼。

 

趁住為演唱會準備嘅空檔,東東喺情人節前,同太太二人世界遊日本,一舉慶祝情人節、結婚紀念日同太太嘅生日。

 

五色丸($128)為墨魚丸、菠菜丸、甘筍丸、紫椰菜丸及墨汁丸,望落去色彩繽紛,食落去夠晒彈牙。

 

牛頸脊肉($368大/$298中),肉質嫩滑。

 

高手出招

除咗音樂、舞蹈,東東演唱會嘅形象都有突破,佢就交由曾經同Big Bang、G-Dragon、Celine Dion、2NE1等巨星級人馬合作過嘅Koyo負責。Koyo喺歐洲憑設計牛仔褲大受歡迎,甚至獲巴黎殿堂級百貨公司「老佛爺」(Galeries Lafayette)欽點,成為首位成功進駐嘅華人設計師,更喺巴黎名街「埃蒂安馬塞爾大街」開設旗艦店,同屬「回流」人士,份外啱Channel。

「今次東東呢個show叫『Planet XT』,俾咗好大嘅發揮空間我之外,佢有好多好爆嘅idea,我要研究吓實質上嘅可行性。不過,框架我已經有一啲idea,係以futuristic(未來主義)為重心。

「其實都可以話幾啱我,因為我鍾意嘅嘢好rock、好dark、好gothic;同東東開一次會之後,我發現我哋嘅concept好似,而佢亦都carry到呢樣嘢。」咁我對東東嘅演唱會,就更加要拭目以待嘞!

Koyo早已從本地衝出歐洲,

 

Koyo係香港十大傑出設計師,同佢合作過嘅巨星不計其數,包括周杰倫。

 

輕鬆過後,東東全力投入操練,提升狀態到最佳水平。

 

雜菜($58)中和於各種豐富配料嘅膩感,更見突出。

 

滑牛($138)質感鮮嫩,經處理後比肥牛更見性格。

 

黑松露鮮蝦雲吞($98),為自家製配料,皮薄多汁。

 

老爹火鍋料理
地址:紅磡黃埔花園九號水產8號舖
電話:21226788