王敏德出路遇着貴人

現年五十三歲嘅王敏德（Michael），外形高大威猛充滿男人味，加上鬼佬性格、鬼佬口音，仲多份莫名嘅親和力，唔怪得之魅力驚人，好有觀眾緣！

早前，東姑撞到佢喺銅鑼灣出巡，一路上就有唔少途人爭相上前向佢「集郵」。呢啲咁嘅情景，似曾相識，就好似發哥周潤發咁，成日畀人驚喜「野生捕獲」，睇嚟Michael都有發哥呢份親民感覺，大家先會咁踴躍搵佢合照。

當日，泊低車喺酒店嘅Michael，先左騰右騰搵銀行撳機，而睇嚟唔多熟路嘅佢，之後再一臉迷惘搵路；期間，佢仍不厭其煩應粉絲要求「集郵」，份人認真nice。而咁啱得咁橋，半路佢就撞到同佢一樣鬼聲鬼氣嘅安志杰、Jessica C.兩公婆。多得安氏伉儷教路，Michael先識路行去羅素街一間表行，原來佢約咗朋友喺表行樓上嘅VIP房飯局。Michael好彩出門遇着貴人指路，否則盲摸摸有排都搵唔到目的地。

泊車喺酒店嘅Michael，對住職員笑騎騎say thank you，相當好禮貌。

街上被人「野生捕獲」嘅Michael，好樂意被「集郵」，仲負責揸埋相機自拍。

搵路搵到好迷惘嘅佢，仍不厭其煩咁應路過fans嘅要求影相，人品真係一流。

半路上遇到同樣鬼聲鬼氣嘅安志杰、Jessica C兩公婆，大家熱情打招呼之外，佢仲乘機向佢哋問路。