謝雪心身形Fit爆

六十五歲嘅謝雪心（心姐），入咗行四十幾年，但咁多年身材都依然係咁fit，長青不老。其實，要keep住身形同靚樣，佢真係落咗唔少工夫，除咗經常游水之外，為咗令身體嘅肌肉唔好鬆弛，以及同拜拜肉、胃腩say goodbye，佢堅持做gym，更加做足廿年。

另外，心姐仲有一個非常體貼嘅老公，構建一個幸福美滿嘅家庭，所以佢每日都可以心情靚靚，皮膚自然充滿光澤啦！

早排，東姑喺銅鑼灣世貿中心撞到佢，初時都不以為意，但係遠距離見到一位身形咁出眾嘅女士行過，東姑梗係望多兩眼，點知原來係心姐。平心而論，有好多後生女，都冇佢咁好嘅身形，廿四吋黃蜂腰，真係羨慕死人，點解冇纖體公司搵佢做代言人o架？

東姑離遠已經見到心姐，因為佢嘅一雙美腿，比起好多少女更纖瘦。

世貿中心食肆林立，搞到心姐完全失晒方向，最後要向職員請教。

入咗行咁多年，心姐一直努力不懈，對自己嘅身形非常有要求，keep住廿四吋腰，非常難得。