為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2019 年 02 月 28 日

田蕊妮劇情配合病情

早前流感肆虐,唔少藝人都中招,其中包括田蕊妮(阿田)。佢更因中咗流感而「冧廠」,暫停無綫新劇《她。她。她的少女時代》嘅拍攝工作。不過,佢只係休息咗一日咁多啫,為免阻礙進度,未病好晒都照開工。

早前,東姑就喺彌敦道,撞到佢為《她》劇拍攝外景。場戲講佢喺大街上,畀好大班記者包圍追訪,仲戴晒口罩左閃右避。後來,佢衝紅燈過馬路,終於成功撇甩班記者。劇情需要佢笠晒口罩演出,正好配合番佢嘅病情,皆因現場有咁多幕前幕後,將流感傳染畀人就唔好啦!

不過,東姑現場所見,雖然阿田剛病完,之但係鬼打咁精神,不單只來來回回奔跑馬路好幾次,一趁空檔仲拉低口罩,同助手猛咁傾。東姑仲睇到助手幫佢喺零食店掃咗成大袋嘢,跟手拎埋去畀阿田過目,相信係幫佢買開工時醫口痕嘅「口垃圾」。睇嚟阿田胃口唔錯,流感已經好番八八九九,唔知係咪由於佢有好老公杜汶澤,煮啲愛心病人餐佢食,所以痊癒得特別快呢?

呢日劇情好配合阿田嘅病人身份,戴晒口罩嘅佢,可以防禦病毒傳染畀啲工作人員。

 

劇情講述阿田畀大班記者包圍追訪,於是驚惶失措,試圖搵路走。

 

戲外,阿田就吩咐助手,幫佢買咗成大袋零食返嚟慢慢歎。啱啱病好嘅佢,鬼打咁好精神,仲拉低口罩同助手傾偈,傾到好興奮。

 

 

 

老公杜汶澤喺社交網讚老婆「唔話得」,連流感病毒都夫妻分甘同味,自己慘被阿田傳染埋。而阿澤仲網晒煮咗愛心病人餐,兩公婆一齊病、一齊食。