為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2019 年 03 月 02 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

科學為我開的一扇窗

香港大學理學院今年慶祝八十周年,好榮幸母校請我返去與學生校友對談。呢一系列講座以「細味人生—科學為我開的一扇窗」為題,可謂正中我嘅想法。我喺四十六年前由港大理學院畢業,之後嘅人生路上,科學為我開咗豈止一扇窗?

我自細求知慾好強,鍾意尋根究底,而真正對科學產生濃厚興趣係由中學開始。嗰陣喺英皇書院讀書,經常唔食晏行去西邊街贊育服務處(前身為贊育醫院,現西區社區中心),嗰度有圖書館,我就利用中午時間借讀《十萬個為甚麼》。呢套書可以話係我少年時代對科學嘅啟蒙讀物,當時睇到入晒迷。

後來升班開始接觸化學要做實驗,將不同化學元素混和變成另一種化合物,覺得又精準又有趣,於是自己走去中環同文街買本生燈(Bunsen burner)、試管同化學物,返屋企自行做實驗。後生一代可能唔知,同文街就喺o依家中環中心隔離,以前專賣化工原料,所以又叫做「化工原料街」,現時拆剩一小截。

所以我考大學時,諗都唔使諗就按興趣揀咗理學院化學系。畢業後我申請入職滙豐銀行,更有幸成為當年銀行請嘅十幾個見習主任之一,因而踏足金融業;而喺銀行同證券業三十幾年後,再喺二○○○年成為全職獨立股評人。

雖然我讀化學同金融業冇直接關係,但我之所以能夠立足金融界,都歸功於理科訓練。讀化學除咗令我了解物質結構、反應和能量轉化等之外,最重要係訓練我嘅分析能力,呢點對於金融從業員係必不可少嘅特質。唔係話分析過就一定做啱投資決定,事實上科學理論都經常被推翻,但經過分析而睇錯股票,最起碼你知道錯喺邊,下次修正分析和投資策略,可以減低出錯機會,好似做滴定化學實驗(titration),不斷嘗試同微量調校,最後至分析出正確成分。

今次返港大理學院對談,學校想我分享同商界領袖接觸,聆聽咁多不同故事後,有乜嘢體會,特別係年輕人夢想創業,希望我同佢哋分享接觸過嘅成功故事。不過,我想提醒年輕人,我做咗接近一百集《商對論》,有一百個成功故事,但係外面一定仲有九百個唔成功或仍在努力嘅故事,呢啲冇俾我訪問嘅公司,佢哋嘅經驗對創業者可能更有參考價值。即使係今日取得成功嘅公司,好似GOGOVAN,創業時佢哋計劃做飯盒廣告生意,結果唔成功轉軚做貨運至捱出生天,如果佢哋唔堅持、唔創新、唔勤力……呢個故事都唔會出現喺我節目。

十年前港大理學院七十周年,表揚四十三個傑出校友,我好榮幸躋身其中。名單中學者固然好多,包括港大前校長黃麗松教授、我老師潘宗光教授,仲有賭王何鴻燊同其他商界人士、前政府官員,好似我同學廖秀冬,另外范徐麗泰都係理科畢業生。今次我聯同兩位傑出校友林超英和潘燊昌細味人生,講到呢度,借呢個欄宣傳下,對談活動將於三月四日五點半喺港大研究生堂舉行,登記可以上理學院網站。

左:陸叔於一九七三年從港大理學院畢業。右:陸叔《人生交叉盤》節目於二○○五年到港大做直播。