為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2019 年 02 月 24 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

新春啟視錄

新年煲劇,其實可以不假外求,香港出品都係佳品,例如之前創下驕人成績嘅《大帥哥》,可觀度都相當高。

但新一年,劇集不論台前幕後,都有新氣象新發展,今次「Paco巨星飯堂」,我就請嚟劇集監製徐正康,率領因劇而人氣飛漲嘅譚凱琪(Zoie)、張達倫同李嘉,去到位於銅鑼灣嘅「鼎爺私房菜」,品嘗精緻嘅粵菜,細說豬年電視圈嘅新方向。

因為《大帥哥》,令達倫、Zoie、徐監製同李嘉,建立起深厚友誼,今年佢哋各有新project,最大受益者都係廣大觀眾。

 

戲寶逐部上

唔止《大帥哥》,徐監製嘅經典作品如《男親女愛》、《棟篤神探》及《鬼同你OT》等,部部膾炙人口,但現已為TVB製作部助理總監(戲劇製作)嘅佢,就預告:「今年我唔會監製嘞,但係TVB仲有好多大製作嘅,好似Zoie都有份嘅《降魔的2》,同埋李嘉有份演出嘅動作劇《唐人街》,暫時confirm咗嘅大製作係呢啲,都係戲寶嚟o架。」

排山倒海嘅高質劇集,Zoie有份參與其中,佢話:「除咗開心之外,我都會繼續準備好自己,希望拍多啲唔同類型嘅作品。我最想試吓動作戲,o依家我有keep住打boxing,仲有搵教香港劍擊隊嘅朋友,教我劍擊,之前學過大聖劈卦,不過我唔夠勤力,冇keep住練,但係如果要我拍打戲,我都唔需要替身,可以自己落場嘅,我都會堅持。」

哈哈哈!望落去弱質纖纖嘅Zoie,竟然有顆武打心,真係估佢唔到!

我同一眾嘉賓,喺位於銅鑼灣嘅「鼎爺私房菜」中,品嘗意頭菜撈起,真係啱晒新正頭!

 

《大帥哥》成績驕人,徐監製話今年繼續有好劇上場,呼籲劇迷要密切期待。

 

喺劇集未能大團圓,但Zoie食麵時巧遇健仔,呢張selfie應該甚得《大帥哥》粉絲嘅喜愛。

 

我同一眾嘉賓今次品嘗嘅鼎爺宴(半席$14,388/一席$23,880,加一另計),菜式各式其色。當中包括發財撈起,以鮑魚、海參、雞絲、海蜇,加上色彩豐富嘅蔬果包括紅椒、黃椒、青椒、蜜瓜、哈蜜瓜、蓮霧及紫洋蔥等,配上秘製的黑松露醬汁,令人回味。

 

花膠杏汁燉白肺,需經繁複工序處理,南杏要預先浸泡一晚,再打成杏汁;白肺經多次汆水及沖洗。之後依次放入瘦肉、白果、火腿、豬肺、杏汁,燉煮一個半小時,再加入杏汁,方能完成。

 

花膠筒雲吞,花膠要預先浸泡約兩小時,經處理後釀入餡料(蝦膠及筍),蒸熟後再淋上鮑汁芡,味道層次豐富。

 

顧家溫暖男

至於同Zoie多次拍檔嘅達倫,o依家就如火如荼地為TVB電視電影《警察故事》,進行拍攝工作。「o依家有家庭又有個仔,我就更加要喺事業上衝刺,一直我都係處於求機會嘅狀態,除咗公司嘅製作,我都有留意外面嘅潛在機會,最理想係拍多啲警匪動作片,我呢個外型,做警察做賊都有說服力o架!」

達倫入晒戲,令佢教仔都有阿Sir色彩。「有時我會企到好直,對個仔好似軍訓咁,叫佢行快兩步,哈哈!佢會照order做o架。」

雖然今年徐監製表示自己冇新作應市,但已為劇集製作大腦嘅佢,就話Zoie將喺大製作中,有大好機會展示演技。

 

啱啱過去嘅農歷新年期間,Zoie同唔同嘅好友相聚,仲抱B拍片,母性大發。

 

達倫同太太非常恩愛,佢話因為囝囝關係,令佢更有工作嘅動力。

 

雙椒蒸東星,先將魚嘅中骨去除,令魚肉於蒸煮過程中能平均受熱,放上炒香嘅白胡椒及柳椒(新鮮花椒)同蒸,甚具特色。

 

 

 

翠綠抱鮑魚,以節瓜小碗盛載湯鮑,精緻味美。

 

補身食蟲蟲

而李嘉,我跟佢個Facebook跟得好貼,就係因為佢對武術嘅知識好淵博。「都係因為研究咗好耐,所以就想同人分享吓。我小學時期就開始喺北京學武,返番嚟香港就追求實戰,不論中國武術、空手道、劍道、巴西柔術⋯⋯同打有關嘅我都有學。

「後來我想與時並進,於是就學埋槍械知識,為咗燒槍我仲考埋輔警添!」

達倫話:「喺大陸拍《大帥哥》外景嗰陣,佢間房晚晚都砰砰聲,原來係佢帶埋個徒弟上去,晚晚同佢對打。」Zoie即刻補充:「佢仲食埋蟲料理,催谷體能!」

李嘉從容回應:「蟲嘅營養價值高,所以我要谷嘅時候,都會入啲蟲嚟食,當時喺大陸就更加方便啦!蟲蟲撈飯OKo架,好味又谷到能量。

「喺我嘅武術世界,係點樣喺現實世界戰勝自己,打擂台戴晒Pad嗰啲,係運動唔係武術,修行係好重要。」

武術根基深厚嘅李嘉,同有心進軍警匪劇市場嘅達倫,喺新一年都朝着目標進發,加油!

 

有需要谷肌肉嘅時候,李嘉會以蘊含豐富蛋白質嘅蟲蟲作食物,仲用埋嚟撈飯,真係膽色同決心嘅表現。

 

 

 

以紅豆沙湯圓作甜品,為整個飯敍劃上圓滿句號。

 

火焰醉蟹煲,火焰來自於將紅米酒澆於砂鍋蓋邊緣位置產生嘅火焰,讓酒從蓋邊滲入鍋內,令花蟹吸收精華。

 

脆皮糯米雞,挑選兩斤半左右嘅新鮮雞,於雞頸處開口,將雞身逐一拆骨,只留雞皮;再將糯米飯,釀入已預先去骨嘅原隻新鮮雞皮中,極考心機同工夫。

 

鼎爺私房菜
地址:銅鑼灣登龍街18號V Point 21樓
電話:23876969