為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2019 年 02 月 14 日

歐陽伯權料任港鐵主席 最快三月公布

港鐵陷入沙中綫風暴,而主席馬時亨就鐵定做到六月請辭。蛇無頭不行,據悉,港鐵主席接任人選已經敲定,預料由美國信安金融集團前高級副總裁兼亞洲區主席歐陽伯權接任的可能性最大,最快三月份公布。至於行政總裁,則金澤培屬大熱。

馬時亨做過私人企業高層經驗,又出任過商務及經濟發展局局長,人脈廣闊,接佢個位嘅都要有番咁上下氣場。

歐陽伯權一度係林鄭班子內嘅財爺人選,不過佢為人比較低調,商界中人話佢喺商界及保險業界口碑好好有江湖地位,判斷力強。不過,政界人就鮮有同佢交手。港鐵正值多事之秋,主席呢個位十足燙手山芋。

港鐵沙中綫通車無期,新主席上場將面對重重考驗。

 

歐陽伯權預料接任港鐵主席,最快三月公布。

單睇港鐵董事局班猛人,就知道新主席要有幾長袖善舞。董事局除咗一班特區高官,港鐵獨立非執董個個都非等閒之輩,包括嘉道理父子有限公司之董事兼主席包立賢、前滙豐亞太區主席鄭海泉、前新華社香港分社社長周南嘅公子周元,以及馬會主席周永健等,新主席是否有力取信於董事局,甚考功力。

應付董事局外,新主席如何鎮得住班管理層,要佢哋通力合作亦是關鍵。沙中綫事件凸顯工程監管漏洞,新主席如何駕馭各方唔會陽奉陰違,唔會下情不上達,都足以左右大局。

咪以為呢份工唔係全職,事實主席幾乎要全身投入,忙過做全職,少啲承擔力都唔得。此外,主席要肯面對公眾,識得解畫、夠厚面皮唔怕人鬧,還有善於跟政府及政黨講數。

港鐵進入風雨飄搖之局,消息人士形容,「未來沙中綫肯定要向立法會申請撥款,如果大家有印象,一六年向立法會申請香港高鐵段增撥一百九十六億時有幾一波三折,如何在提心吊膽中通過,就知道未來沙中綫一役更難應付。議員唔砌到你暈至奇。」

其次,政府認為港鐵監管有問題,或有機會提出控告,主席要有足夠心理準備處理,「你睇近日政府開行火力轟港鐵,估計佢哋唔會輕輕放過。」陷入連番風雨嘅港鐵,股價依然相當硬淨,未來項目逐步完成,收入有機增加,股價應該繼續靚仔。所以,點樣帶領港鐵喺政治旋渦中保持盈利能力,將是新主席的大挑戰。

兩度請辭但獲特首挽留的馬時亨,留任至今年中便功成身退。

 

港鐵常務總監金澤培因實戰經驗豐富獲賞識,有望升任CEO一職。