為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2019 年 02 月 16 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

過年時 念舊時

新春當前,我祝願香港新年有新景象。不過迎新唔代表忘舊,事實上每年過節我都特別懷念舊時。我生於五十年代,真正懂性係六十年代,對過年嘅記憶最早係六、七歲時。

農曆年係我細個時每年最渴望嘅日子,以前物資短缺,尤其我屋企家窮,每年只會買一套新衫同一對新鞋,就係買嚟過年,年三十晚前一兩日仲會去剪個頭髮,真係全身上下都係新嘅嚟迎接新年。當時社會普遍貧困,但係小朋友都好生性,平日恨食零食但唔會有,衫褲鞋襪當然係舊嘅,我哋都唔會扭計要買。當然,扭都唔會有!所以等到頸都長到新年,可以滿足少少願望,嗰種喜悅o依家嘅小朋友真係好難理解。

講返轉頭,當時無論屋企幾窮,媽媽都會買新衫辦少少年貨嚟過年,證明當時嘅人幾重視農曆年。對於我嚟講,年三十晚嗰餐團年飯嘅滋味真係o依家都記得,但印象最深刻嘅係一家人全部返晒嚟,甚至有內地親戚會落嚟過節,媽媽家姐夾手夾腳喺廚房煮飯,成間屋都係人,感覺好溫暖。

由於對新年十分渴望,所以媽媽去西環辦年貨我都一定要跟住去,唔係想攞糖食,而係希望提早感受過年氣氛。其實當時買嘅都係少少瓜子、唐糖,但對於平日冇零食嘅我,已經非常吸引。

o依家小朋友興sleepover,以前當然冇呢件事,但係每逢年三十晚,我都興奮到瞓唔着,因為我可以請一啲朋友嚟屋企,大家傾偈傾天光,一齊期待年初一到臨,第一時間換新衫新鞋。呢套新衫我會一着着到年初十,到返學至肯換,因為希望留住過年嘅美好感覺,唔想過年咁快過去。

小朋友過年逗利市最開心,但我都算懂事,逗完返屋企立刻繳械,畀媽媽用嚟再封過第日拜年用。當時封利市普遍一、兩蚊,間中都有十蚊廿蚊,我逗利市同時媽媽亦要封畀人。我好細個已經幫媽媽計數,支出幾多收入幾多,仲列個小朋友版「損益表」嚟睇下「賺」定「蝕」。雖然成個過程我都冇「分紅」,但係媽媽有時會畀少少我keep住買零食,當時已經好開心。

香港喺一九六七年禁止燒爆竹,之前准燒嘅時候我哋上天台玩,對我嚟講亦係一年一度嘅盛事。到如今我屋企睇到煙花,感覺反而冇以前咁興奮,過年氣氛亦冇咁濃厚。而媽媽過世後,統籌開年飯嘅責任落咗喺我度。雖然大家都會圍埋食餐飯,但係團年嘅感覺已經唔同舊時,下一代亦未必參加。

我仔女孫仔孫女住得近,經常見面,不過初一仍然堅持要佢哋拜年,我自己初一亦一定會去同家姐拜年,希望保留少少傳統。初二就係朋友上嚟拜年睇煙花,熱熱鬧鬧開年,捕捉返從前大家庭嘅溫暖感覺。

我懷念舊時過年,其實真正懷念嘅係當時嗰種懂得珍惜嘅態度,同埋親友互相關懷嘅人情味。簡簡單單食餐飯,閒話家常,已經係幸福。

我懷念舊時過年,其實真正懷念嘅係當時嗰種懂得珍惜嘅態度,同埋親友互相關懷嘅人情味。