菊梓喬急做facial補靚樣

出道兩年多嘅菊梓喬（Hana），喺《2018年度勁歌金曲頒獎典禮》爆冷奪得「最受歡迎女歌星」，一度引來唔少爭議。

得獎後，佢亦順理成章做埋無綫旗下唱片公司「星夢」嘅一姐，工作自然排山倒海，更惹嚟傳媒追訪。日前，佢連環穿梭兩間電台接受訪問後，即駕車落尖沙咀。唔講唔知，佢揸嘅車相當另類，係法國品牌雪鐵龍（Citroёn）C3系列，喺香港甚為少見。當日，薄施脂粉嘅佢，原先以真面目示人，但行經大街大巷便立即戴上口罩。

之後，佢同東姑透露正準備去做facial，並坦言︰「我好怕醜，唔慣好多人影我！我唱歌咋！未試過咁多相機對住自己！」跟住，佢上樓做足三粒鐘facial扮靚。始終娛樂圈呢行，聲色藝都要俱備，佢雖然把口唱得，但靚樣更加要keep。

當日，Hana心情靚爆，事後意猶未盡，離開時邊行邊發短訊，再駕車落太子。原來，佢約咗一名女友人，泊好車後，便由女友人帶領到達一座唐樓，佢哋透露係上朋友屋企食盆菜。今年大豐收嘅Hana，梗係要搵齊啲friend慶祝喇！

「升呢」為「最受歡迎女歌星」嘅Hana，工作量大增，日前工作後，即駕車去尖沙咀做facial。

一走出大街，Hana即刻戴上口罩，佢解釋話係怕惹人留意喎。

而當佢發現記者拍照時，更將雙手掩面，一臉害羞。

即使獲得無綫加持，奪得「最受歡迎女歌星」獎；不過，佢始終出道冇耐，難怪全程未有途人注意佢。