為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2019 年 02 月 09 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

豬年有玄機

呢篇稿見刊時臨近農曆新年,我陸叔響呢度先祝各位東周讀者豬年行大運,身體健康,財源廣進。每到農曆新年,坊間都會搵啲玄學家為來年把脈,今期我都搵咗我哋業內好友兼玄學名家羅奇峰為大家用另類角度,睇下豬年有咩機遇!

陸叔請來金融業好友兼玄學名家羅奇峰(左)分析豬年玄機。

陸:舊年無論世界政經大事、樓市、股市,都處於一個唔係幾好嘅年頭,踏入豬年,情況會唔會繼續?定係會有轉機?你可否從玄學角度同我哋分析下?

峰:係呀陸叔,舊年『戊戌』狗年,其係一個乾土年,喺燥土嘅環境下,整體大局欠咗生機,所以不論經濟、政治、投資氣氛都受到打擊,中美貿易戰就係其中一個副產品。事實上,要貿易、股市向好,流年五行要見到『水』先會有助力,舊年天干地支一齊見土,結果可想而知了。今年『己亥』豬年,天干為土、地支為水,但要留意係始終仍有土嘅力量影響,好比有啲濕泥倒咗入水中,整體大局唔會一百八十度扭轉,但相比舊年,已經係有明顯嘅轉機。坦白講,中美貿易戰唔係一件個別事件,係長期中美政治角力嘅結果,無諗過可以一時三刻解決,即使為事件起卦,得出結果仍然拖拖拉拉,即使得到階段性嘅解決方案,仍會留有尾巴,但係市場已習慣咗呢啲雜音,影響性不大。

陸:如果聽你咁講,似乎今年應該多番啲機遇。坦白講,從基本面及技術面來分析,雖然世界陷入經濟增長放慢嘅勢頭,但反而會炒放水,對股市都係利好,唔知你用玄學角度去睇,會否另有啟示呢?

峰:正如我上文所講,今年流年見水,都係有利中國及香港嘅五行,即使經濟大局不濟,但有水來潤澤,總比舊年純土為好,加上今年立春八字算係唔錯,財、祿俱見,對整體投資環境有利好作用。但係有一點都要留意,因為立春八字都係有沖尅,所以都擺脫唔到波動市況,投資唔會一帆風順,留意農曆一、二月及初夏嘅調整,都可以視為機遇。但要補充一點,一個人投資成唔成功,好睇個人格局,我見有人投資好容易賺錢,就係條命食得起,相反亦然。

陸:香港人最關心嘅樓市,舊年已見有走入轉角市跡象,你又點睇?

峰:如果我睇樓市,唔會用一兩年嘅五行去睇,係要捉一個大趨勢。陸叔你都記得十幾年前我講過,二○○四年進入下元八運(天運),係一個超級資產趨升大運,所以有錢有能力要買樓。不過,二○二三年開始由八運進入九運,固定資產膨脹嘅爆炸力不復當年,如果資金不足而又想透過買樓致富,似乎時機不就了。其實如以『地運』計算,舊年進入咗九運,樓市表現已先行做咗一場預演,所以我認為樓市仍有調整壓力,但天運仍在八運嘅餘蔭下,仍不會大跌。

陸:明晒,多謝奇峰兄分享。總之點都好,希望個個豬年諸事順心,賺到盤滿缽滿。