主頁 > 專欄 > Paco巨星飯堂 > 你咪理，笑住睇！ 2019 年 02 月 10 日

黃栢高

黃栢高(Paco)，金牌經理人，叱吒樂壇三十年，炮製無數金曲，捧紅不少歌手。近年涉足電影，《行運超人》、《龍咁威》、《殺破狼》等，皆叫好叫座。最新動作，除於本刊主持《Paco巨星飯堂》，每逢周一更在《頭條日報》主持「名人會」專欄，專訪城中名人、紅星。

你咪理，笑住睇！

恭喜發財！新正頭，香港人梗係乜都唔理，一家人齊齊整整，睇番套賀歲片，合家歡一番！今年賀歲片百花齊放，由王祖藍處男執導嘅《你咪理，我愛你！》，仲係改編自百老匯歌舞劇，喺傳統嘅賀歲片中，添加創意。

今次「Paco巨星飯堂」，我就請嚟導演，率領有份參演嘅方力申同吳沚默，去到位於尖沙咀嘅「樂天經典」，品嘗特色嘅新加坡菜式，拆解笑聲背後，更多嘅笑聲。

賀歲片《你咪理，我愛你！》係祖藍處男執導嘅作品，集香港首屈一指嘅演員班底於一戲，包括小方同吳沚默，全部以歌舞劇形式演出，意念創新。

祖藍一腳踢

一定要恭喜祖藍！終於一圓導演夢，而且處男作仲係賀歲鉅獻！原來威風背後，佢付出咗好多o架。「呢部戲其實嚟自十幾年前，『風車草劇團』已經改編咗百老匯嘅原作《I Love You, You’re Perfect, Now Change》，當年我都有份寫劇本o架！今次再將佢改成電影，由十二個故事組成。因為香港冇乜呢類型嘅歌舞劇，新年梗係要開開心心，咁就不如俾啲新嘢觀眾睇啦！

「由決定改編開始，我哋好努力去同百老匯嗰邊傾版權，我都飛過去美國一次，面對面同佢哋傾。到斟掂咗，又要着手改歌詞，我想啲歌詞貼地得嚟又好笑，所以咪自己改囉。」

講到呢度，小方即刻話：「導演仲錄埋demo俾我哋聽，堅係一腳踢！我哋有90%嘅對白都要唱出嚟，所以拍之前都會喺現場錄音，導演就播demo俾我哋聽，有晒感情o架！」

我帶三位嘉賓，去到位於尖沙咀嘅「樂天經典」，品嘗特色嘅新加坡菜，笑談拍攝賀歲片嘅點滴，令觀眾歡樂過豬年。

電影以十二個故事組成，當中有影帝志偉同影后毛姐，加上實力派嘅劉雅麗同蔣志光（中排左至右），合演其中一個故事，夠晒目不暇給。

冰鎮苦瓜拌桂花蜂蜜（$48），特選上等苦瓜，片成了幾近透明嘅薄片，配上特調秘製桂花蜂蜜醬，香甜清爽的美味。

蒜香紅海蜇頭（$75），酸中帶少辣嘅海蜇頭，爽彈惹味。

星洲黑胡椒螃蟹（$368/1.2公斤）沿用極具新加坡風味嘅獨家食譜，並由新加坡樂天海鮮餐廳行政總廚Tiew Boon Wee巧妙製作，黑椒味道辛辣可口，完美配合新鮮多汁嘅蟹肉。

小方打頭陣

哈哈哈！雖然祖藍付出120%，但佢都謙稱：「呢啲應該做嘅，而且小方做足功課，多得佢賣力演出，試片嗰時，啲老闆睇佢同王菀之個故事，睇得好high。本來我諗住將個故事放後啲o架，但一見到咁嘅環境，就將小方打頭陣，掂呀！」

而小方就不忘大讚對手王菀之，「未計今次，之前我同王菀之合作過三次，其中一次咁啱就係去年嘅賀歲片，所以默契就一早培養好o架嘞！雖然係咁，但係喺佢身上仍然有好多值得學習嘅地方，佢話晒都係金像獎最佳女配角，對角色演繹真係有研究過，我都唔敢怠慢！

「但係我記住Paco話，唱歌先唔好理唱功技巧嗰啲，不過一定要落足感情。我就俾足咁多感情去唱，搞到拍完個shot，王菀之睇完playback，即刻話要再錄過音夾我，哈哈！」

導演同小方惺惺相惜，二人都對對方嘅表現有讚冇彈，一團和氣。

首次擔任導演，祖藍（右一）事事親力親為，由撰寫劇本、斟洽版權，到錄demo，佢都親自上陣。

小方同王菀之四度合作，默契自然毋庸置疑，導演祖藍選擇以佢哋打頭陣，必定有原因。

酥炸豬肉蝦棗（$68），外皮薄而超級香脆，內裏為鮮甜豬肉球，配料包括蘿蔔粒、蝦粒及蔥粒，口感層次豐富。

菜香鐵板豆腐（$98小/$147中/$196大），豆腐外脆內軟，加上秘製菜心肉碎醬，更有特色。

眾高手列陣

稱得上係斤両十足嘅賀歲片，又有十二個歌舞故事組成，祖藍嘅處男作，仲有連編劇都做得出色嘅吳沚默，祖藍話：「沚默係才女嚟o架，佢由《老表》開始就做編劇，今次就只做演員啫。」

沚默表示：「今次我有份演出其中一個故事，飾演伴娘嘅角色，有時婚禮上嘅伴娘，都可以有啲好瘋狂嘅行徑。」

祖藍嘅作品星光熠熠，有獎門人志偉、影后毛姐等列陣，但係佢話今次喺執導上，都要多謝小方。「就係因為佢同王菀之嘅故事，係我第一場拍嘅戲，之後先拍Sammi、祖兒嗰啲。喺拍Sammi嗰時，我就俾小方個sample佢睇，咁佢就自然會做好啲；到拍祖兒嘅時候，我就俾Sammi條片佢睇，咁佢又會鞭策自己o架嘞。」