陳慧琳打造煲呔蝦餃仔

樂壇天后陳慧琳（Kelly）大仔劉昇（蝦餃仔）同細仔劉琛（小籠包），就讀同一間平民國際學校。早前，Kelly就透露，細仔小籠包不幸中招患上甲型流感，發燒發到四十度，要停學兼隔離喺自己房，搞到廿四孝媽咪心痛死。至於大仔，現讀四年班嘅蝦餃仔，就好生性，仲擔心細佬有事，童言無忌問媽媽：「細佬會唔會死o架？」睇嚟佢哋兄友弟恭，感情唔錯。

而東姑早前就有幸欣賞到佢哋今年度嘅校刊，發現蝦餃仔已經連續第三年，隆而重之咁戴上煲呔影學生相，造型唔只醒目，仲成為佢指定嘅「嘜頭」，睇嚟媽咪Kelly一番苦心，幫囝囝打造獨特形象。而愈來愈大個仔嘅蝦餃仔，仲發育得特別好，企埋喺全班同學度影班相，都被安排企最後排位置，除咗生得高大之外，仲幾大件頭大大隻咁，一定唔會畀人蝦，相信佢喺同學入面相當出眾，完全遺傳晒媽咪優良嘅DNA。

而較早之前，東姑仲巧遇Kelly親身去到學校接放學，同其他家長一樣喺校門口排隊，耐心等兩個寶貝仔落堂，睇嚟平時天后湊仔，唔係隨隨便便假手於人。難怪，湊到兩個仔精精叻叻，佢肯定勞苦功高！

廿四孝媽咪Kelly唔會假手於工人湊仔，不時仲見佢親自接囝囝放學，同大班家長排排等。

戴住煲呔官仔骨骨影學生相嘅蝦餃仔，笑容燦爛，明顯由媽咪幫佢飾心打扮過，相當sharp醒，而佢個英文名就叫Chace。

蝦餃仔分別喺二年班、三年班嘅校刊度，都戴住煲呔影佢嘅學生照，煲呔無疑成為佢嘅標記。

Kelly同老公Alex好熱衷參與兩個囝囝喺學校嘅家長活動，好似細仔小籠包嘅學校party或者親子旅行，夫妻仲一齊出席。