為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2019 年 02 月 03 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

電視無限Fun

o依家嘅本地電視節目百花齊放,受惠嘅梗係觀眾,好似免費頻道「香港開電視」,綜藝資訊節目都有唔同類型選擇,令觀眾有電視、手機,就已經夠晒Fun。

今次「Paco巨星飯堂」,就請到頻道四位女主持:黃芳雯(Paula)、盧頌恩(妹頭)、李麗珊(Lisa)同鄺芷凡(Omi),去到位於九龍城嘅「三和叙」,嘆住特色日本料理,暢談自己主持嘅節目特色。

妹頭、Paula、Lisa同Omi(左至右)為「香港開電視」主持唔同類型嘅資訊節目,各有千秋。

 

Hi-tech香港地

現今嘅網絡世界,令資訊泛濫,雖然擴闊咗唔少人嘅視野,但同時都令我哋忽略咗本土唔少發展。Paula表示:「我同妹頭有份主持嘅《發現酷》,就介紹唔少香港人發明嘅高科技。」

妹頭話:「其實香港有唔少不為人知嘅高科技項目,而且仲同我哋嘅生活息息相關。因為主持呢個節目,令我有唔少免費做身體檢查嘅體驗,最近一次就係去驗中風機率。過程一啲都唔複雜,只係好似驗眼咁,三十秒就知道結果,主要係睇眼球嘅血管分布,去推測中風嘅風險。

「呢個發明係想令基層人士,可以容易啲知道自己嘅健康有冇事。雖然過程同驗眼相似,但係驗嗰部機就同平時嘅驗眼機唔同,有某啲眼鏡舖都有呢部機,所以不論貧富,都可以用到呢個科技o架。」

哈哈哈!呢個科技真係有用!咁我都要睇吓我去開嘅眼鏡舖,有冇嗰部檢驗機先!

我帶四位嘉賓去到位於九龍城嘅「三和叙」,嘆住高品質嘅日本料理,暢談自己主持嘅節目特色。

 

Lisa同Paula都有合作主持節目。

 

農曆新年將至,妹頭就同楊天命主持賀年節目,喜氣洋洋。

 

今次我同一眾嘉賓品嘗嘅「三和叙八道菜季節時令品餐單」($1,880不連清酒,可加$500配備清酒),八道菜包括舞茸菇黑松露炒飯,另有前菜:秋鮭一夜干、蕪菁及季節酢物。

 

季節刺身盛合為大廚發辦,挑選每日最鮮食材炮製。

 

蜆清湯,清甜鮮味。

 

非品牌「明治」

除咗《發現酷》,Paula仲身兼另一節目《明治憑甚麼》嘅主持,「因為2018年係日本明治維新150周年,我同項明生就分別去咗日本唔同嘅地方,睇吓維新對我哋日常生活,留低咗乜嘢嘅影響。

「其中一樣係雪糕,o依家當然好普及啦,但係當年一杯雪糕,要成¥10,000,即係港幣成700蚊!因為當時要喺美國運冰去日本,成本好高,所以只係有錢人嘅食物。我仲去咗較鄉村啲嘅青森,當地人好熱情,連旅遊局嘅工作人員都特別nice。」

Lisa主持嘅《外人自己人》,係另一個有特色嘅節目。「我會訪問住喺香港嘅外國人,好多受訪者嘅廣東話都講得好好。

「佢哋好了解香港文化,有啲甚至仲了解香港多過我,其中有個嚟自法國嘅受訪者,仲帶我去深水埗嘅活雞場,教我點樣睇雞Pat pat去估佢哋嘅年紀。我先知原來唔同年齡嘅雞,pat pat嘅size同顏色都有分別。」

除咗一齊主持《發現酷》,Paula同妹頭各自都為另外嘅節目擔任主持。

 

連牛奶都同明治維新有關,真係要睇Paula嘅節目先知。

 

妹頭早前偷得浮生,去馬爾代夫度假。

 

 

 

鐵板燒鹿兒島黑毛豬(上圖)及鐵板燒佐賀和牛,兩款燒物任擇其一。

 

多元Art到人

唔少節目都同香港人有關,連Omi主持嘅節目都唔例外。「我同YouTuber Gordon一齊主持《香港Art Like》,介紹香港嘅藝術。好多人話香港係文化沙漠,其實一啲都唔正確,我就喺節目度,以YouTuber嘅模式,喺唔同角度睇香港嘅文化藝術發展。

「有一次我去訪問一個教大聖劈卦嘅師傅,佢將大聖劈卦同泰拳糅合咗,期間叫我用盡全力踢佢,我踢落去佢小腿嘅時候,發現佢對腳好似樹幹咁硬,真係好厲害!」

Omi同Lisa分別喺唔同角度,闡釋

 

因為主持節目,令Lisa要以中、英雙語工作,佢話自己嘅英語能力因而提升。

 

新一集嘅節目中,Omi介紹咗一啲本地微型藝術家,可以到hkopentv.com或下載app重溫。

 

鐵板燒鰻魚,惹味!

 

紫蘇葉捲秋刀魚天婦羅,皮薄多汁。

 

燒北海道雪場蟹,保留原味。

 

三和叙
地址:九龍城福佬村道46號地下
電話:23210867、57439409