為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2019 年 01 月 31 日

免試請英聯邦醫生 再惹爭議

流感殺到,公立醫院醫護做到無停手,上周六約一百三十名醫生舉行申訴大會,食衞局局長陳肇始及醫管局行政總裁梁栢賢亦出席聆聽前線嘅意見。有醫生話,公立醫院o依家忙到似戰場,政府及醫管局卻缺乏實質措施增加人手、挽留資深醫生,以紓緩前線工作壓力。

杏林覺醒成員、屯門醫院心臟專科醫生黃任匡在會上,建議當局容許英聯邦國家醫生可以免考試嚟香港公立醫院執業,呢番話引起外界譁然。黃任匡接受本刊查詢時承認,建議幾敏感,「呢個諗法會被視為政治唔正確,但確實係最快提供人手嘅方法,始終英聯邦醫生同香港醫生嘅訓練水平接近,質素有一定保證。」

負責處理海外醫生來港行醫申請嘅醫委會主席劉允怡,一直反對海外醫生免試來港執業,對豁免某類醫生唔使考試亦有保留。「如果接受英國、美國、澳洲,內地醫生會問你點解唔認可佢哋?」佢認為,與其被指歧視某些地區醫生嘅專業,不如劃一要考試。

出席申訴大會嘅醫生高舉「爆」字嘅紙牌,表示公立醫院「爆晒廠」,佢哋做到踢晒腳。

消息人士表示,公立醫院往往喺流感高峰「爆廠」,原因除咗醫院及牀位不足,另一「元兇」係本港培訓嘅醫生護士未能迎合人口老化帶來嘅醫療需求,「人口老化下,公院每年求診人次直線上升。但訓練本地醫生護士需要時間,一個專科醫生起碼要接受十幾年培訓先可以投入服務。喺需求激增,本地培訓嘅醫生護士平穩增長下,公院有乜辦法唔逼爆?」

陳肇始(右三)及梁栢賢(左三)出席申訴大會,聆聽前線嘅意見,並表示會正視人手不足問題。

本地醫護不足,局方只好招聘海外醫生,但本地醫護界嘅保護主義強烈,招聘海外醫生遇到阻力,過去也有醫生組織建議畀英聯邦醫生免考試來港執業,亦爆發政治爭議。消息人士感歎說:「幾乎每次爆流感,大家都會關注醫護人手不足問題,然後就會討論聘用海外醫生,進一步再爭辯請乜嘢醫生?點樣核實佢哋執業資格?最後又演變成一次政治化討論。呢種情況循環不息,無限輪迴,最終都無解決實質問題。」

據悉,醫管局幾經辛苦,今年終於引入十九名海外醫生,將投入公院嘅家庭科、急症科工作,消息人士說:「之後仍會繼續努力引入海外醫生。」

流感高峰下,醫護人員每日做唔停,愈做愈谷氣。