為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2019 年 02 月 02 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

時代的生活藝術

貓王有首歌叫〈Home is Where the Heart Is〉,係我嗰個時代嘅金曲,歌名就套用一句永恆金句。「家,心之所在」,當然係至理名言,用心建造家園亦係好多地產商嘅企業使命,個別發展商更喺呢個理念之上加入品牌特性,樹立獨特形象。

品牌不但係對外形象,亦係內部營運指引,更加有助確立企業發展方向。好似時代中國(1233)以「生活藝術家」作為品牌理念,正正因為見到市場嘅單一化趨勢,因而構思點樣可以打破常規,與別不同,令品牌更突出之餘亦令資源運用更有效。公司解釋,生活藝術家係幫人實現對居住嘅理想,能夠做得到,全靠一班熱愛生活、做事專注、富有創造力嘅團隊。

翻閱公司年報,見到各項目好有設計創意,公司亦強調項目嘅配套設施,用嚟豐富住戶嘅藝術體驗。公司依循生活藝術方向,二○○三年仲夥拍廣東美術館成立時代分館,並邀請著名建築師喺廣州設計永久空間,一○年正式完成;一八年更喺德國柏林建立美術館,今年初舉行開幕展覽。

時代中國在一九九九年創立,見證兩個世紀更替,到今年剛好二十周年。公司以城市服務商為業務定位,旗下有地產、商業物業、城市更新、家居設計、智能鄰里服務等業務;當中物業銷售係主業,一八年未經審核合同銷售(連合營項目)金額接近六百零六億元(人民幣),簽約建築面積逾三百七十萬平方米。

大家成日都講大灣區機遇,時代中國喺珠三角城市扎根,有地利優勢,可以令大灣區嘅布局更完整。截至一八年六月底,公司喺九個城市擁有土地儲備總建築面積約一千八百二十萬平方米,其中九成一坐落大灣區。

雖然話中國地產市場龐大,但要從眾多房地產商突圍而出都唔容易。一間地產商再大都冇可能迎合整個內地市場,所以時代中國將個餅切細,將資源同精力集中喺中高端住宅物業上。公司將目標客戶群鎖定喺中高收入家庭,當然係因為佢哋嘅可支配收入和購買力較高,但公司嘅理念係以人為本,了解中高端亦有不同個人和家庭類型,所以再將客群細分,發展出成長型、成熟型和成功型住宅物業,更切合客戶需要。

另外,公司由住宅發展到「時代.未來小鎮」,初步計劃投資三十個項目,由大灣區起步,已經同地區政府簽定二十幾個小鎮。既然講得係小鎮,當然會有配套設施,喺鎮內提供住戶日常所需,如教育及醫療等,目的係將「產、城、人、文」集於一體。

地產商已經唔能夠停留喺單純起樓、賣樓階段,時代中國就以城市發展服務商作為業務延伸點,由服務「人」拓展到服務「城市」,即係通過城市更新、物流倉儲、教育等業務板塊,組成完整嘅產業鏈。同時公司推出「時代+」平台,解決買樓、交樓同埋社區服務等令買家困擾嘅問題,線上社群亦令住戶有更緊密嘅關係。

時代變遷,永恆不變嘅係人對美好生活嘅追求。

時代中國在一九九九年創立,到今年剛好二十周年。時代變遷,永恆不變嘅係人對美好生活嘅追求。