為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2019 年 01 月 17 日

林鄭辣㷫建制 三隧分流要講數

長者綜援嘅合資格申領年齡原定下月起,由六十歲收緊至六十五歲,引起立法會議員反對,特首林鄭月娥上周四反指政策:「係各位(議員)批准」,辣建制、泛民議員。據了解勞福局研究為長者綜援設過渡期,補貼受影響人士,讓雙方有下台階。

據悉,特首辦主任陳國基(KK)連日約見各黨議員,強調林鄭無擺議員上枱之意。席間佢再次為三隧分流方案拉票,「政府提出嘅三隧收費無約束力議案下周喺立法會討論,KK呢排頻密推銷,皆因呢個方案係林鄭操刀制訂,不容有失,但爆咗長者綜援風波後,政府好擔心三隧方案受拖累,難獲通過。」消息人士透露。

各陣營議員都話,今次討論三隧方案會打醒精神,皆因該方案與長者綜援一樣唔太討好市民,當局建議東隧、紅隧加價,及豁免專營巴士西隧隧道費,拉近三隧收費距離。

為爭取議員支持,政府最近放軟口風,「之前講到修訂空間有限,上周先肯有少少退讓,換取議員支持。」消息人士話,當局答應調低私家車嘅隧道費加幅,並用巴士隧道費收入補貼其他巴士票價,令乘客受惠。但據悉,各陣營議員o依家猶豫不決,因為擔心貿然支持,日後又畀人話「係各位批准」。

長者綜援風波搞到咁大件事,連建制派也反枱,據悉建制派呢啖氣谷咗好耐,有建制派消息人士說:「功勞無我哋份,鑊就大把。」據悉,林鄭上台後「吹和風」,多次向泛民示好,建制派不是味兒,例如補選安排,唔聽建制派分兩次舉行嘅建議,仲揀喺三月、部分建制派要上京開兩會嘅時候舉行,最係去年政府提出空置稅,「明明最初提出係工聯會麥美娟,最後將功勞畀晒公民黨郭榮鏗,有乜辦法唔火?」

無獎不特止,長者綜援風波更令建制派失分。「林鄭嘅講法令人覺得我哋失職。要知道綜援係最關乎基層嘅政策,民建聯及工聯會主要面向呢類選民,今次被擺上枱,好易令選民以為該黨與民為敵,對今年底區選及明年立法會選舉不利。」建制派人士說。

林鄭一句:「係各位(議員)批准」引起軒然大波,政府頻頻「撲火」,希望緩和行政立法關係。

 

建制派今次咁可謂冰封三尺非一日之寒,據悉佢哋對林鄭吹和風有意見,谷咗啖氣好耐。

 

林鄭親自操刀制定三隧分流方案,政府不容有失,唔想方案受長者綜援風波拖累胎死腹中。