為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2019 年 01 月 19 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

電子錢包淺談

最近金管局公布農曆新年發行新鈔嘅詳情,並繼續呼籲市民用「迎新鈔」(即係用過但仍新淨嘅鈔票) 嚟封利市。原來過去三年三間發鈔銀行喺過年前,平均提供約三點五億張新鈔或迎新鈔,以應付封利市所需,於是近年有人提議封電子紅包,唔使排隊唱新銀紙。不過港人普遍都係鍾意封新簇簇嘅銀紙,攞個意頭,所以利市暫時未能電子化。

雖然利市電子化未普及,但各種電子支付方式近年就大力推廣,所以唔少人手機裡面多咗幾個電子錢包。可能有人覺得香港採用電子支付比其他城市落後,但計埋八達通,我哋嘅起步並唔算遲。不過嘟卡一般只係用嚟搭車及小額購物,並未發揮電子支付嘅真正威力。

我做訪問好開心遇到新經濟公司嘅管理層,可以乘機學新嘢。AlipayHK係其中一個積極開拓香港市場嘅支付平台,我同營運平台嘅公司APSHK行政總裁陳婉真(Jennifer)傾偈,佢透露AlipayHK由起初一萬個商戶,發展到現時已增至兩萬五千個,覆蓋大約八成大型商戶,拍得住有一萬六商戶、二萬四個零售點嘅八達通。

近期金管局大力推動電子支付系統「轉數快」,支援唔同銀行、唔同儲值支付工具之間嘅小額轉賬。系統令用戶可憑對方手機號碼或電郵快速付款,全天候都可以轉錢。有金管局同政府嘅推動,見得到市民對電子支付嘅信心大咗,亦令市場個餅大咗。

消費者信心大咗,但市場上亦多咗幾款電子錢包,係咪容納得到?根據二○一七年銀行業資料,八達通使用率高但只係佔零售金額百分之五,信用卡支付則佔整體一半,最後現金佔四成多。對比其他城市,香港現金支付比率的確較高,可見電子支付仍有發展空間。Jennifer覺得市場上有不同平台,對公司影響不大,因為各個平台都有自己嘅限制,例如信用卡一般收取商戶嘅手續費較高,八達通則需要商戶投資一筆安裝費用等。比較之下,AlipayHK啟動成本較低,只需要大部分商戶都有嘅掃描器,又或者再簡單啲就咁將收款Barcode打印出嚟比客人掃描,手續費亦相宜。

電子支付一般較難進入長者市場,Jennifer解釋,AlipayHK使用程序簡單,只需耍掃一掃條碼,輸入密碼然後確認資料就完成轉數,長者亦可以請商戶幫忙。公司見到市場普遍反應正面,將增加覆蓋率及計劃擴展至不同商戶,如街市檔等,等市民「無現金買餸」,將來甚至「無現金出戶」。另外亦可以用佢嚟交電話費、電費、管理費、收費電視、煤氣費等。

當然,保安係電子支付最重要一環,金管局有明確規例要各平台遵守,AlipayHK喺每一單交易後會向用戶發出通知,應用程式(App)內亦有過往交易記錄供用戶查閱。另一方面,精明嘅消費者會用唔同信用卡嚟享受回贈同折扣,呢點電子支付平台係咪可以競爭?Jennifer話電子支付綁信用卡一樣有回贈同儲分,仲可以儲電子印花。我自己就期待電子錢包支援跨境付款,第日出門真係唔使帶銀包。

市場上有幾款電子錢包, 我期待電子錢包支援跨境付款,將來出門就真係唔使帶銀包。